Mesazh i Papës për Ditën Botërore të Thirrjeve: të ndjekësh Jezusin është propozim
impenjativ, por edhe ngacmues
(10.02.2011 RV)“Ndjekja e vullnetit të Zotit nuk e asgjëson, as e shkatërron
njeriun”: kështu shkruan Papa Benedikti XVI në Mesazhin për Ditën e ardhshme Botërore
të lutjes për thirrjet në jetën e shuguruar, që do të kremtohet më 15 maj, të dielën
IV pas Pashkëve. Tema e sivjetme është “Propozimi i thirrjeve në Kishën lokale”. “Sidomos
në këtë kohë, kur zëri i Zotit duket sikur mbytet nga zëra të tjerë dhe propozimi
për ta ndjekur, duke e dhuruar jetën, mund të duket tepër i vështirë, çdo bashkësi
e krishterë, çdo besimtar duhet të marrë përsipër me vetëdije impenjimin për të nxitur
thirrjet”, shkruan Ati i Shenjtë. Papa këshillon të inkurajohen dhe të mbështeten
ata që tregojnë shenja të qarta se duan të bëhen meshtarë, apo rregulltarë. Duhet
ta ndjejnë ngrohtësinë e krejt bashkësisë, kur i thonë “po” Zotit dhe Kishës, vazhdon
Benedikti XVI. “Unë vetë – nënvizon më tej – i inkurajoj, ashtu siç kam bërë me ata
që kanë vendosur të hyjnë në seminar, të cilëve u kam shkruar: ‘Keni bërë mirë’. Sepse
njerëzit do të kenë gjithnjë nevojë për Zotin, edhe në epokën e mbizotërimit të teknikës
e të globalizimit. Do të kenë nevojë për Zotin, që na është treguar në Jezu Krishtin
e që na mbledh në Kishën universale, për të mësuar me Të e përmes Tij jetën e vërtetë
e për t’i pasur parasysh e për t’i zbatuar kriteret e humanitetit të vërtetë”. Në
fund, Papa i nxit ipeshkvijtë të mendojnë për nevojat e krejt Kishës, duke i shpërndarë
meshtarët në mënyrë të barabartë nëpër botë.