Հայերու Նկատմամբ Ազրպէյճանի Ցեղասպանութիւնը Ճանչնալու Մասին Նախագիծ Ազգային Ժողովի
Մէջ։
Հայաստանի Ազգային ժողովին մէջ շրջանառութեան մէջ դրուեցաւ «1988-1994 թուականներուն
ընթացքին հայերուն նկատմամբ Ազրպէյճանի ոճրագործութիւնները իբրեւ ցեղասպանութիւն ճանչնալու
մասին» յայտարարութեան նախագիծը, որուն հեղինակն է Ժառանգութիւն Կուսակցութեան խմբակցութեան
քարտուղար Լարիսա Ալաւերտեան։ Ժառանգութիւն Կուսակցութեան խմբակցութեան տարածած հաղորդագրութեան
համաձայն, նախագիծին լրամշակուած տարբերակը քննարկուած է արտաքին յարաբերութիւններու
խորհրդարանական մնայուն յանձնախումբի հերթական նիստին։Հեղինակին համաձայնութեամբ եւ յանձնախումբին
որոշումով, նախագիծին քննարկումը յետաձգուած է 30 օրով, որպէսզի պատգամաւորներուն կարելիութիւն
տրուի լիարժէք ձեւով ծանօթանալու յայտարարութեան բնագիրին։