Pakistan: Musharraf i hetuar për vrasjen e Benazir Butos.
(08.02.2011 RV)Ish-presidenti i Pakistanit, Pervez Musharraf, që gjendet në
azil në Londër, është hetuar për vrasjen e udhëheqëses politike Benazir Buto. Hetimet
janë zhvilluar nga Agjencia Federale e Hetimeve e Pakistanit, por qeveria nuk është
vënë në dijeni nga frika se mos ndërhynte. Lajmi u dha sot nga e përditshmja pakistanase
“Dawn”. Sipas gazetës, hetuesit nuk e kanë informuar me dashje as ministrin e brendshëm
Rehman Malik, e as komandantin e policisë Uasem Ahmed, që të shmangeshin ndërhyrjet
e mundëshme me hetimet. Benazir Buto u vra më 27 dhjetor 2007 ndërsa po dilte
nga një Park në Ravalpindi. Një kamikaze u hodh në erë fare pranë makinës së saj duke
vrarë simpatizantë të partisë së Butos dhe disa truproje. Sidoqoftë, ekziston një
film ku shihet qartë një snajper që e godet Buton në kokë kur kjo gjendej jashtë makinës
për të përshëndetur turmën. Dyshimet e hetuesve bien mbi ish-presidentin Musharraf,
sepse atë ditë ai kishte ndërruar komandantin e truprojeve të Butos dhe pas atentatit
kishte dhënë urdhër që sheshi të pastrohej menjëherë, pa i dhënë mundësi policisë
për të hetuar.