Në Indonezi, myslimanët sulmojnë tri kisha dhe një jetimore të krishterë
(08.02.2011 RV)Mijëra myslimanë sulmuan sot tri kisha, një jetimore të krishterë
dhe një qendër shëndetësore në Indonezi, në qendër të ishullit të Javës. Dhuna shpërtheu
pas vendimit gjyqësor për një rast blasfemie. Një i krishterë, Antonius Riçmond Bauengan
u arrestua në tetor 2010 me akuzën se kishte shpërndarë material misionar, i cili
fyente disa simbole islamike. U dënua me pesë vjet burgim, por turma kërkonte dënimin
e tij me vdekje. Vetëm policia arriti t’i shuajë protestat, që sot shkaktuan dëme
të rëndësishme në kishën katolike të Shën Pjetrit e të Shën Palit dhe djegjen e një
kishe pentekostale. Grupi i fanatikëve u sul pastaj kundër një jetimoreje katolike
dhe kundër qendrës shëndetësore të Murgeshave të Provanisë Hyjnore. Sipas ipeshkvit
të Semarangut, dioqeza ku ndodhën sulmet, kemi të bëjmë me “dhunë të paramenduar”.
Ta dëgjojmë imzot Johanes Puxhasumartën, me telefon nga Indonezia: Në këtë moment,
gjendja po përmirësohet, por vërtet kemi pasur probleme të mëdha. U plaçkitën kishat:
iu vu zjarri dy kishave protestante dhe u sulmua edhe kisha katolike. Famullitari
u godit nga protestuesit. Cila është gjendja e përgjithshme në Indonezi, përsa
i përket ekstremizmit islamik? Ndjej keqardhje të thellë, sepse gjatë kohëve
të fundit, gjatë muajve të fundit në veçanti, po rritet intoleranca nga ana e grupeve
të fanatikëve. Kjo konfirmohet edhe nga një raport i pavarur i Institutit Setara
për Paqe e Demokraci. Gjatë vitit 2010 janë verifikuar 216 raste dhunimi të lirisë
fetare në Indonezi e janë sulmuar 43 vende të krishtera kulti. Ironi e fatit: jo më
larg se të dielën, në vend filloi Java e Harmonisë ndërmjet feve, organizuar nga Kombet
e Bashkuara. Në Xhakartë mijëra besimtarë të të gjitha feve mbushën rrugët e kryeqytetit
për të festuar këtë “harmoni”, e cila nuk qe e tillë as atë ditë. U vranë tre myslimanë
të një sekti, që konsiderohet heretik nga integralistët islamikë.