Në Engjëllin e Tënzot: lutja e Papës për paqen në Egjipt dhe thirrja për mbrojtjen
e jetës.
(07.02.2011 RV)Thirrja e re për paqen në Egjipt dhe lutja që në këto troje,
të bekuara nga prania e Familjes Shenjte, të shikohet, mbi të gjitha, e mira e përbashkët,
ishin në qendër të vëmendjes dje, në lutjen e Engjëllit të Tënzot, kremtuar në Sheshin
e Shën Pjetrit. Duke kujtuar se dita e djeshme i kushtohej jetës, Papa e nxiti shoqërinë
civile të punojë për kulturën, e cila pranon plotësisht se çdo njeri, edhe ai më i
ligështi, ka vlerë të pamohueshme të patjetërsueshme.
Të jetë kripë, për t’i
dhënë shije botës; të jetë dritë, për të ndriçuar edhe errësirën më të thellë! Këtë
kuptim ka misioni e dëshmia e vërtetë e të krishterit, të cilin dje Papa, duke marrë
shtytjen nga Ungjilli i Mateut, e ripohoi me forcë në lutjen e Engjëllit të Tëznot,
duke i nxitur besimtarët të kenë si synim kryesor dijen, vlerë tejet e lartë, që përfshin
në vetvete shijen e kripës e vezullimin e dritës, pa të cilën njeriu do të ecte nëpër
jetë si i verbër. “Dishepujt e Krishtit janë të thirrur t’i japin shije të
re botës, ta ruajnë nga prishja, me dijen e Zotit, e cila ndriçon plotësisht në fytyrën
e Birit, sepse është Ai drita e vërtetë, që ndriçon çdo njeri (Gjn.1,9).
Të bashkuar me të, të krishterët mund të rrezatojnë, në mes të errësirës
së indiferencës e të egoizmit, dritën e dashurisë së Hyjit, dije e vërtetë, që i jep
kuptim gjithë jetës e veprës së njeriut”. Zoti i kundërvihet thellësisht
prepotencës të së keqes, ripohoi Ati i Shenjtë e, pasi kujtoi ditët dramatike që po
kalon Egjipti, u lut edhe një herë për paqen e për të mirën e çdo njeriu, në të katër
anët e botës: “Në këto ditë, ndjek me vëmendje situatën delikate të Kombit
të dashur egjiptian. I lutem Zotit që kjo Tokë, e bekuar nga prania e Familjes Shenjte,
të gjejë përsëri qetësinë e bashkëjetesën paqësore, në impenjimin e përbashkët për
të mirën e përgjithshme”. Zoti kujdeset për njeriun në çdo situatë, vuan
bashkë me të e i ngjall në zemër shpresa të reja për të ardhmen, pohoi Papa e, duke
kujtuar Ditën për jetën, kremtuar dje, i nxiti të gjithë e në mënyrë të posaçme breznitë
e reja të mjekëve, për të vënë në jetë një kulturë të vetëdijshme për vlerën e pamohueshme
të çdo njeriu. Kur kërkimi shkencor e teknologjik udhëhiqet nga vlera të vërteta etike
– vijoi Ati i Shenjtë – krijohen të gjitha mundësitë për gjetjen e rrugëzgjidhjeve
të përshtatshme, për mbrojtjen e jetës, që në zënie, e për vlerësimin e amësisë: “Uroj
që të gjithë të impenjohen për kulturën e jetës, për ta vënë njeriun në qendër të
vëmendjes, në çdo rrethanë. Sipas fesë e arsyes, dinjiteti i njeriut nuk varet nga
gjendja e tij shëndetësore, as nga aftësitë e nuk mund të mohohet, edhe kur ai është
i ligshtë, i paaftë për punë e nevojtar për ndihmë”. Një datë tjetër e
rëndësishme që kujtoi Benedikti XVI, ishte ajo e 11 shkurtit të ardhshëm, kur Kisha
do të kremtojë Zojën e Lurdës e, me të, edhe Ditën botërore të të sëmurit, sivjet
me temë: “Nga plagët e Tij jeni shëruar”. Rast i përshtatshëm, pohoi Papa, për t’i
kujtuar bashkësisë kishtare dhe shoqërisë civile kujdesin për njerëzit që vuajnë nga
sëmundjet e ndryshme të trupit: “Uroj, prandaj, që të gjithë punonjësit e
shëndetësisë ta shikojnë të sëmurin jo vetëm si trup të ligshtë, por mbi të gjitha,
si njeri, të cilit duhet t’i shërbejnë me të gjithë solidaritetin e mundshëm, duke
i siguruar, me kompetencë, mjekimet e përshtatshme”.Së fundi Papa përshëndeti
anëtarët e Lëvizjes së dashurisë familjare e të gjitha ata që, të mbledhur në Kishën
romake të Shën Gregorit VII, u lutën tërë natën për të krishterët e persekutuar në
botë e për lirinë fetare.