Mesdheu është në fermentim. Editorial i atë Federiko Lombardit: Duke parë Afrikën
e Veriut
Pothuaj të gjitha vendet e Afrikës Veriore janë ngritur kundër qeverive e pushtetit
të deritanishëm. Rasti i fundit është ai i Egjiptit, me protestat, që qysh në ditët
e para shkaktuan mëse 150 viktima. Sheshi kryesor i Kajros u mbush me miliona protestues,
që kërkojnë dorëheqjen e presidentit Mubarak, në pushtet që prej 30 vjetësh. Duan
ndryshime, që diktatura nuk ua jep lehtë. Vërtet, largoi gazetarët e huaj, përveç
turistëve, me çdo mjet, errësoi internetin dhe çdo lidhje me jashtë, në mënyrë që
bota të mos merrte vesh. Por milionat arritën ta ngrenë zërin edhe përtej kufijve.
Editoriali i zëdhënësit të Selisë së Shenjtë, atë Federiko Lombardi i kushtohet pikërisht
kësaj situate. Ta dëgjojmë: “Bota sheh këto
javë drejt Afrikës Veriore e Lindjes së Mesme. Fillimisht Tunizia, pastaj Egjipti
e vendet e tjera, ku u vunë në lëvizje procese ndryshimesh politike, akoma të vështira
për t’u përcaktuar e vlerësuar, por sigurisht kaq domethënëse, sa të flitet për “revolucion”. Të
gjithë shpresojmë, që popujt e këtyre anëve të mos derdhin gjak e të mos zgjatet koha
e paqëndrueshmërisë, gjatë së cilës rreziku i kundërvënieve dhe i ndeshjeve është
më i madh. Natyrisht, vështirësitë ekonomike, kushtet e varfërisë, që sprovojnë shtresa
të mëdha të popullsisë, ashpërsuar nga kriza ekonomike globale, kanë pasur peshë të
madhe në fillimin e protestave. Por, siç kanë vënë në dukje ipeshkvijtë e Afrikës
së Veriut, duhet kuptuar se njerëzit presin më shumë “liri e dinjitet”, sidomos “brezat
e rinj të rajonit, gjë që kthehet në vullnet për t’u konsideruar si qytetarë e, madje,
si qytetarë të përgjegjshëm”. Popullsitë e zonës kanë një përqindje të
lartë të rinjsh, që nuk shohin asnjë perspektivë për të ardhmen. Në këtë kontekst,
vijnë në mend këshillat e Sinodit për Lindjen e Mesme, i cili vetëm pak muaj më parë
uronte, që të krishterët të kishin qytetarinë e plotë në vendet e tyre. Tani, janë
popuj të tërë, që kërkojnë të ushtrojnë me më tepër përgjegjësi të drejtat e qytetarisë,
që i takojnë çdo njeriu, pavarësisht nga feja dhe që i ndihmojnë ta ndjejnë veten
njerëz me dinjitet. Të krishterët janë një pakicë shumë e vogël, por janë solidarë
me këta popuj e ushqejnë të njëjtat shpresa. Nëse këto kombe me shumicë myslimane
do t’ia arrijnë të ndryshojnë, duke përdorur dialogun, respektimin e të drejtave të
të gjithëve, të drejtën e pjesëmarrjes, lirinë, paqja e botës do të jetë më e sigurtë.
E urojmë këtë me gjithë shpirt, pikë së pari për të mirën e tyre, por edhe për të
mirën e krejt familjes së popujve”.