(31.01.2011 RV)Komisioni Qendror i Zgjedhjeve në Kosovë shpalli mbrëmë rezultatet
përfundimtare të zgjedhjeve të jashtëzakonshme parlamentare të 12 dhjetorit. Sipas
tij, Partia Demokratike e Kosovës ka fituar 32.11 për qind të votave dhe do të ketë
34 deputetë në parlamentin e ardhshëm; Lidhja Demokratike e Kosovës ka fituar 24.69
për qind, apo 27 vende në parlament; Lëvizja “Vetëvendosje” do të ketë 14 deputetë,
pasi ka fituar 12.69 për qind të votave, e ndjekur nga Aleanca për Ardhmërinë e Kosovës
me 11.04 për qind të votave, përkatësisht 12 deputetë. Së fundi, Koalicioni Kosova
e Re (AKR) me tetë deputetë, që i takojnë në sajë të 7.29 për qind të votave, ndërsa
Partia Liberale Serbe (SLS) do të ketë 8 deputetë, e ndjekur nga partitë e tjera të
pakicave etnike, të cilave u takojnë nga 4 e më pak deputetë në Kuvend. Pritet të
fillojnë takimet ndërmjet krerëve partiakë për formimin e koalicionit qeverisës.