Engjëlli i Tënzot: Papa lëshon pëllumbat e paqes dhe e fton botën t’ua hapë zemrën
vlerave të Lumturive
(31.01.2011 RV)Kisha nuk ka frikë nga persekutimet, as nga presionet e një
shoqërie, që i kushton vëmendje të dorës së parë mirëqenies materiale dhe i lë pas
dore vlerat e shpirtit. Këtë pohoi dje Papa, duke komentuar, gjatë lutjes së Engjëllit
të Tënzot, Lumturitë ungjillore, propozuar nga liturgjia e së dielës. Në përfundim të
lutjes mariane, Benedikti XVI kujtoi Ditën Botërore të luftës kundër gërbulës dhe
atë të lutjes për paqe në Tokën Shenjte. E më pas, Papa lëshoi nga dritarja e studios
së tij, dy pëllumba, i shoqëruar nga dy fëmijë të Veprimit Katolik. Pëllumbat u rikthyen
në studio, u lëshuan përsëri e, së fundi, njëri prej tyre rrahu flatrat drejt qiellit
blu. Fluturim i vështirë, simbol i një paqeje, që tronditet në të katër anët, në botën
tonë të shqetë.
Kur Jezusi e shndërroi malin në ‘katedër’, nuk e bëri për të
propozuar një ideologji të re, por për t’i mësuar njerëzimit se pasuritë qiellore
e shuajnë etjen e i thajnë lotët e atij që vuan, shumë më tepër sesa pasuritë e se
ngushëllimet tokësore. Tek ky mësim u ndal Benedikti XVI, duke reflektuar për atë,
që e quajti ‘fjalimi i madh” i Lumturive, i cili tingëllon gati-gati si Ungjill brenda
Ungjillit. Mesazhi i Krishtit mbi mal, ku shpall të lum të braktisurit, i drejtohet
mbarë botës, sot e në të ardhmen – pohoi Papa – e mund të kuptohet e të jetohet, vetëm
duke ecur në gjurmët e Krishtit: “Nuk është fjala për një ideologji të re,
por për një mësim, i cili vjen nga lart, nga qielli e i drejtohet njeriut nga një
Zot, që u mishërua, pikërisht për ta shpëtuar. (…) Lumturitë janë program i ri jete.
E çlirojnë njeriun nga vlerat e rreme të botës e i tregojnë cilat janë pasuritë të
vërteta, të sotme e të nesërme. Kur Zoti ngushëllon, kur shuan etjen për drejtësi,
kur than lotët e të mjerëve, do të thotë se jo vetëm që e shpërblen secilin sipas
veprave të veta, por i hap edhe rrugën drejt mbretërisë së qiejve”. Duke
marrë shtytje nga komenti i Lumturive në librin i tij “Jezusi i Nazaretit”, Benedikti
XVI vërejti se kryqi e ringjallja e Krishtit, janë edhe kryqi e ringjallja e dishepujve.
E kjo, sepse në jetën e dishepujve pasqyrohet plotësisht jeta e Birit të Zotit, i
cili i lë kundërshtarët ta persekutojnë, ta poshtërojnë e deri ta dënojnë me vdekje,
vetëm e vetëm që t’u dhurojë njerëzve shëlbimin. E është pikërisht kjo sjellje, që
ka lënë gjurmë të pashlyeshme mbi dymijë vjet historie të Kishës: “Ungjilli
i Lumturive komentohet lidhur me historinë e Kishës, histori e shenjtërisë së krishterë,
sepse – siç shkruan Shën Pali – Hyji zgjodhi ata, që në sytë e botës janë të marrë,
për t’i turpëruar të mençurit; ata, që janë të dobët, për t’i turpëruar të fortët;
zgjodhi ata, që janë asgjë, për të asgjësuar kë mendon se është gjithçka. Prandaj
Kisha nuk ka frikë nga varfëria, nga poshtërimet, nga persekutimet, në një shoqëri
e cila shpesh tërhiqet vetëm nga mirëqenia materiale e nga pushteti i kësaj bote”.
Pas lutjes së Engjëllit të Tënzot, Papa hyri në dialog të drejtpërdrejtë me mijëra
të rinj të Veprimit Katolik, që arritën në Sheshin e Shën Pjetrit, pasi kishin përshkuar
rrugët e Romës, duke organizuar, kështu, Karvanin tradicional të paqes, kryesuar nga
kardinali mëkëmbës, Agostino Valini. Benedikti XVI i përshëndeti të rinjtë me përzemërsi
të madhe e pastaj ia dha mikrofonin një vajze, që u duk në dritaren e studios së
tij, së bashku me një shok të vogël. Dy fëmijë, në të dy krahët e Atit të Shenjtë!
Vajza, pasi e përshëndeti Benediktin XVI dhe e njoftoi për disa projekte solidariteti
të Veprimit Katolik, bëri një thirrje prekëse për paqen në botë: në botën e vogël,
të përditshme të secilit nga ne, e në botën e madhe, të trazuar, që shpesh ndikon
tragjikisht mbi shpresat dhe mbi ëndrrat e miliona njerëzve: “Kohët e fundit
kemi dëgjuar mjaft lajme të këqija. Shumë njerëz vendosin të përdorin dhunën, për
të imponuar idetë e tyre politike e fetare. E pra neve, sa herë grindemi me shokët,
të mëdhenjtë na thonë gjithnjë se duhet të pajtohemi, se duhet të flasim me njëri-tjetrin,
se duhet të shkojmë mirë. E sot ne duam t’ua përsërisim këto fjalë të gjithëve: duhet
ta duam njeri-tjetrin si vëllezër, pavarësisht nga feja e kultura, së cilës i përkasim”. Në
përfundim të lutjes së Engjëllit të Tënzot, Papa kujtoi edhe Ditën Botërore të të
gërbulurve, duke përshndetur shoqatën italiane “Miqtë e Raul Follerò”, e cila pikërisht
këtë vit kremton 50-vjetorin e veprimtarisë. Pas lutjes për njerëzit, që vijojnë
edhe sot e kësaj dite të vuajnë nga një sëmundje e tillë e tmerrshme, Ati i Shenjtë
lëshoi pëllumbat, simbol i paqes, aq të kërkuar e aq të dëshiruar nga mbarë njerëzimi.