Liturgjia e Fjalës e së Dielës së 4-t të Kohës gjatë Vitit kishtar ‘A’
Ja përsëri në takimin tonë javor të së shtunës, kësaj here do të dëgjojmë e meditojmë
së bashku leximet biblike të liturgjisë së Fjalës së Zotit të dielës së 4-të gjatë
vitit kishtar, ciklit të parë, sipas kalendarit liturgjik. Në këtë të diele të katërt
të kohës liturgjike gjatë vitit kishtar, Liturgjia e Fjalës Hyjnore na paraqet Ungjillin
e Lumnive. Në pjesën ungjillore marr nga shën Mateu, Jezusi duke parë turmën, ngjitet
në mal dhe me Apostujt përreth, u flet njerëzve, duke përcaktuar të gjitha lumnitë
e Mbretërisë së Hyjit: “Lum skamnorët në shpirt, sepse e tyre është Mbretëria
e qiejve. Lum ata që qajnë, sepse do të ngushëllohen! Lum ata që janë të butë,
sepse do ta trashëgojnë tokën!...” Në veprën e tij “Jezusi i Nazaretit”, Papa
Benedikti XVI i kushton një kapitull të tërë (të katërtin) pikërisht predikimit të
Jezusit në Mal e më shumë se gjysma është për lumnitë. Çelësi interpretues i Atit
të Shenjtë na kërkon që t’i kthejmë sytë nga Krishti. “Lumnitë – shkruan Papa – janë
një biografi e fshehtë, e brendshme e Krishtit, si një portret i figurës së tij”.
“Tek Lumnitë – shkruan akoma – bëhet i dukshëm misteri i vetë Krishtit dhe ato na
thërrasin të bashkohemi me Të”. E më pas, në profilin e shenjtërisë së jetuar nga
Shën Françesku i Asizit, Papa na tregon një shembull të jetuar të vargut të Lumnive,
që përmend Krishti. Benedikti XVI thotë se kur shën Françesku gjeti Krishtin u varfërua
nga gjithçka tjetër. Kaq shumë e kishte pasuruar Jezusi. Vetëm në këtë rrugë që tregon
Predikimi i Malit – përfundon Papa – gjejmë pasurinë e jetës, madhështinë e thirrjes
njerëzore.
Më shumë mbi Liturgjinë e Fjalës së Zotit të kësaj së diele,
mund të dëgjoni këtu...
Leximi i parë (Sof 2, 3; 3, 12-13)
Profeti
Sofonia jeton në një komb që pothuajse është shkatërruar plotësisht dhe sheh në të
varfërit, në të përvuajturit mundësinë për të kërkuar Zotin, për t’iu shmangur gjykimit
të Zotit dhe për të vazhduar nëpërmjet besimit të tyre veprën e shpëtimit të Hyjit..
Lexim
prej Librit të Sofonisë profet
Kërkojeni Zotin, të gjithë ju, të përvuajturit
e tokës, ju që i kryeni urdhërimet e tij! Kërkoni drejtësinë, kërkoni butësinë, që
disi të mund të fshiheni Ditën e felgrimit të Zotit! Do të bëj në mjedisin tënd të
qëndrojë populli i përvuajtur e i varfër! Në emër të Zotit do të kërkojë strehim Teprica
e Izraelit. Paudhësi nuk do të bëjnë më, rrena më nuk do të thonë, në gojë të tyre
s’do të gjendet më gjuhë gënjyese! Por do të kullosin e do të mrizojnë pa pasur kush
t’i shqetësojë!”
Fjala e Zotit
Psalmi 146 (145)
Ref: Lum
skamnorët në shpirt. _________________
Zoti e mban besnikërinë për amshim, Ai
u jep të drejtën të nëpërkëmburve, u jep ushqimin të uriturve. Zoti i çliron
robërit, _____________
Zoti u jep dritën e syve të verbërve, Zoti i ndreq
të kërrusurit, Zoti i do të drejtët, Zoti i mbron ardhacakët, _____________
U
ndihmon bonjakëve e të vejave, ndërsa mëkatarëve ua pështjellon udhët. Zoti
do të mbretërojë për jetë, Hyji yt, o Sion, nga breznia në brezni. _________________
Leximi
i dytë (1 Kor 1, 26-31)
Hyji ka treguar fuqinë e tij dhe dijen e tij duke shpëtuar
ata që besojnë, me një mjet kaq të brishtë që anjë i ditur i kësaj bote s’do ta kishte
menduar të aftë për të shpëtuar: Kryqi i Jezusit. Tani ky realitet është i dukshëm
në jetën e të krishterëve. Pjesa më e madhe e tyre janë njerëz që nuk kanë ndikim
në shoqëri e megjithatë Hyji i ka bërë dëshmitarë të shpëtimit të tij.
Lexim
prej Letrës së parë të shën Palit apostull drejtuar Korintasve
Vëllezër,
pleqëroni kush jeni ju që e morët thirrjen e Hyjit? S’ka ndër ju shumë të dijshëm
për sy të njerëzve, as shumë të fuqishëm, as shumë bujarë! Por, Hyji zgjodhi të marrët
në sy të botës për t’i turpëruar të mençurit dhe të dobëtit në sy të botës i zgjodhi
Hyji, për t’i turpëruar të fortët; dhe jo bujarët e botës e të përbuzurit i zgjodhi
Hyji, mu edhe ata që nuk janë, që t’i asgjësojë ata që janë, në mënyrë që asnjë njeri
të mos mburret para Hyjit. Po, Ai bëri “që ju të jeni” në Krishtin Jezus, i cili u
bë për ne dije që vjen prej Hyjit, drejtësi, shenjtërim dhe shpërblim, siç thotë Shkrimi
i shenjtë: ‘Kush mburret, le të mburret në Zotin.’
Fjala e Zotit
ALELUJA, Aleluja. Gëzohuni
e galdoni, sepse i madh do të jetë shpërblimi juaj në qiell! Aleluja.
V
Ungjilli (Mt 5, 1-12)
Lumturia që premtohet këtu i përket mbi të gjitha
atij që i druhet Zotit. Ajo u premtohet nga Jezusi kategorive të ndryshme personash
e mbi të gjitha të varfërve në shpirt. Këtyre personave që nuk kanë rëndësi para
njerëzve, por vënë besimin e tyre në Zotin, u është dhuruar lumturia. Mund ta
jetojnë lumturinë e Krishtit Jezus ata që pranojnë Jezusin në jetën e tyre dhe vënë
në jetë fjalën e tij. Lumturitë janë dokumenti më i rëndësishëm i Ungjillit:
tregojnë rrugën e re për të arritur shpëtimin.
Leximi i Ungjillit të shenjtë
sipas Mateut Jezusi, kur pa turmën, u ngjit në mal. Kur u ul, iu afruan nxënësit
e tij. Atëherë mori fjalën dhe i mësoi duke thënë: “Lum skamnorët në shpirt, sepse
e tyre është Mbretëria e qiejve! Lum ata që qajnë, sepse do të ngushëllohen! Lum
ata që janë të butë, sepse do ta trashëgojnë tokën! Lum ata që kanë uri e etje
për drejtësi, sepse do të ngihen! Lum të mëshirshmit, sepse do të gjejnë mëshirë! Lum
ata që janë të pastër në zemër, sepse do ta shohin Hyjin. Lum pajtuesit, sepse
do të quhen bijtë e Hyjit. Lum ata që salvohen pse kryejnë çka Hyji kërkon, sepse
e tyre është Mbretëria e qiejve. Të lumët ju kur t’ju shajnë e t’ju salvojnë dhe
kur, për shkakun tim, t’i thonë të gjitha të zezat kundër jush, por në rrenë! Gëzohuni
e galdoni, sepse i madh do të jetë shpërblimi juaj në qiell! Jo po, kështu i salvuan
edhe profetët para jush!”.
Fjala e Zotit
Më shumë mbi Liturgjinë
e Fjalës së Zotit të kësaj së diele, mund të dëgjoni këtu......