Ndeshje e arrestime në Egjipt, ku vazhdojnë manifestimet kundër Mubarakut
(28.01.2011 RV)Në Egjipt, mijëra manifestues po sulmojnë Ministrinë e Jashtme
dhe televizionin shtetëror. Policia pengoi ish-drejtorin e Agjensisë ndërkombëtare
për energjinë atomike, Mohamed El-Baradei të marrë pjesë në manifestimin kundër qeverisë
së presidentit Hosni Mubarak në Kajro. El Baradei, që u kthye dje në atdhe, ka themeluar
kohët e fundit “Shoqatën Kombëtare për ndryshim”, e cila kërkon reforma demokratike
e shoqërore. Policia arrestoi edhe katër gazetarë francezë. Ndërkaq, manifestimet
po përhapen me shpejtësi në të gjithë kryeqytetin. Kryetarja e diplomacisë së Bashkimit
Evropian, Kethrin Eshton u kërkon autoriteteve egjiptiane të respektojnë të drejtën
e qytetarëve për të protestuar paqësisht.