Këshilli i Evropës: propozohet një Ditë evropiane për martirët e krishterë të kohëve
tona.
(27.01.2011 RV)Një Ditë evropiane, kushtuar martirëve të krishterë, për t’u
kujtuar të gjithëve shumë e shumë të krishterë të mbytur për shkak të urrejtjes kundër
fesë e kundër Kishës. E propozoi sociologu italian, Massimo Introvigne, përfaqësues
i Organizatës për Sigurim e Bashkëpunim në Evropë (OSBE), duke kujtuar se u duhet
shpallur luftë intolerancës dhe diskriminimit kundër të krishterëve. Propozimi u bë
dje, gjatë një takimi të Këshillit të Evropës të Strasburgut, ku u diskutua rreth
temës “Ç’përgjigje jep Evropa, përballë persekutimit të të krishterëve lindorë”. Në
takimin, organizuar nga qendra evropiane për të Drejtën e Drejtësinë (Eclj), morën
pjesë edhe imzot Antuen Audo, ipeshkëv katolik i ritit kalde të Alepit (Siri) dhe
atë Emanuel Jukahana, administrator apostolik i Kishës Asire të Lindjes. Shumkush
nuk e ka ende të qartë ç’do të thotë intolerancë e persekutim kundër të krishterëve.
Tre të katërtat e persekutimeve të sotme në botë, drejtohen kundër të krishterëve.
Janë bashkësia më e munduar, po këtë shumkush nuk e di – nënvizoi Introvigne – e më
pas kujtoi ngjarjen e madhe ekumenike, organizuar nga Gjon Pali II në Koloseum, më
7 maj të vitit 2000, me tetë stacione të Udhës së Kryqit. Ishin simbol i grupeve kryesore
të martirëve të krishterë të kohëve tona: viktima të totalitarizmit sovjetik, të komunizmit
në vende të tjera, të nazizmit, të ultra fanatikëve islamikë, të nacionalizmave fetare
të dhunshme në Azi, të urrejtjes fisnore e antimisionare, të laicizmit agresiv e të
kriminalitetit të organizuar. Pikërisht 7 maji, në kujtim të kësaj ngjarjeje të
madhe – vijoi Introvigne – mund të ishte data e përshtatshme për Ditën e kujtimit
të martirëve të krishterë. Suksesi që pati Dita e Kujtesës për luftë kundër antisemitizmit,
edhe në shkolla, na kujton, natyrisht jo për të bërë konkurencë, se duhet propozuar
një mjet analog, në kujtim të shumë martirëve – fjalë që ka kuptimin e dëshmitarëve
- të persekutimit e të intolerancës kundër të krishterëve. Kjo ditë, vijoi përfaqësuesi
i OSBE-së për luftën kundër kristianofobisë, mund të jetë rast që çdo vit të bëhet
një rrëmim kolektiv i ndërgjegjes. Njëkohësisht do ta nxiste Evropën të mos e harrojë
detyrën për mbrojtjen e pakicave të krishtera në vende të ndryshme. Introvigne kujtoi,
në përfundim, thirrjen e Gjon Palit II në Koloseum, më 7 majin e vitit 2000, drejtuar
shekullit të ri, të XXI-it, që po lindte: “Të mbetet i gjallë në shekuj e në mijëvjeçarin
e sapofilluar, kujtimi i këtyre vëllezërve e motrave tona. Madje të mbahet gjithnjë
i freskët. Të përcillet nga breznia në brezni, që të ndikojë në përtëritjen e të
gjithë njerëzve”. Kremtimi i një Dite Evropiane të Martirëve të Krishterë, përfundoi
sociologu, do të ishte përgjigjja më e bukur, që do të mund t’i jepej thirrjes, gjithnjë
aktuale, të Gjon Palit II.