Qeveria e Tiranës mbështet një hetim të plotë mbi ngjarjet e 21 janarit
Kryeministri Shqipërisë Sali Berisha siguroi sot Drejtorin Ekzekutiv në Shërbimin
e Jashtëm të BE-së Miroslav Lajcák, i cili është i dërguari i Bashkimit Evropian për
të diskutuar me faktorët politikë shqiptarë mbi situatën e krijuar si pasojë e protestave
të dhunshme dhe përpjekjeve për përmbysjen e rendit kushtetues dhe institucioneve
të zgjedhura në mënyrë demokratike," se qeveria shqiptare mbështet një hetim të plotë,
objektiv, profesional, e mbi të gjitha të paanshëm të ngjarjeve." Zyra e shtypit
pranë kryeministrisë, bëri të ditur se kryeministri Berisha i paraqiti zotit Lajcák
një ekspoze të ngjarjeve që çuan në përpjekjen e dhunshme të 21 janarit dhe mbi pozicionin
e qeverisë shqiptare lidhur me situatën. Duke shprehur falënderimin për mbështetjen
dhe interesin për hetimin, Kryeministri Berisha e siguroi zotin Lajcák se qeveria
shqiptare mbështet një hetim të plotë, objektiv, profesional, e mbi të gjitha të paanshëm
të ngjarjeve, thuhet ne deklaratën zyrtare te Kryeministrisë. Kryeministri siguroi
gjithashtu për vendosmërinë e qeverisë shqiptare për mbrojtjen e Kushtetutës, të shtetit
ligjor dhe institucioneve demokratike në vend, përkarshi çdo tentative për shkeljen
e tyre, deklarohet me tej. Sipas tyre, z. Lajcák i rikonfirmoi kryeministrit Berisha
mbështetjen e plotë të Bashkimit Evropian duke theksuar së ajo e konsideron qeverinë
Berisha si partner dhe qeveri legjitime të Shqipërisë si dhe vlerësoi si një akt përgjegjësie
të lartë nga ana e kryeministrit vendimin për mos mbajtjen e manifestimit të ditës
së shtunë duke theksuar se ky qëndrim duhet të ndiqet edhe nga opozita. "Zoti Lajcák
u shpreh se BE kërkon nga palët, shmangien e organizimit të protestave për të evituar
përshkallëzimin e akteve të dhunshme kundër institucioneve demokratike dhe shtetit
ligjor", thuhet ne deklaratën zyrtare të Kryeministrisë. Gjithashtu bëhet e ditur
se Lajcak ka theksuar se "BE kërkon nga të gjitha palët rivendosjen e dialogut politik
në Parlament për të vijuar ecjen përpara me agjendën e integrimit evropian veçanërisht
atë të statusit të vendit kandidat dhe përqendrimin të gjitha energjive në përgatitjen
për zgjedhjeve lokale të 8 Majit".( nga ATSH-ja)