EULEX-i nuk fillon hetimet pa të dhëna konkrete rreth trafikut të organeve
EULEX-i kërkon e pret të marrë më parë të dhënat mbi të cilat bazohen akuzat rreth
trafikut të organeve për të nisë më pas procesin hetimor. Kështu deklaroi zëdhënësja
e EULEX-it, Aleksandra Xhorxh duke pohuar se pavarësisht miratimit në Këshillin e
Evropës të rezolutës së zviceranit Dick Marty, EULEX-i nuk mund të nisë asnjë hetim
lidhur me akuzat për trafik organesh në Kosovë dhe Shqipëri, pa evidenca konkrete
nga ana e hartuesit të raportit. Aleksandra Xhorxh, shpjegoi se EULEX-i ka dërguar
dy letra në adresë të Dick Marty, përmes të cilave i bën thirrje të furnizojë autoritetet
e prokurorisë në kuadër të EULEX-it me çfarëdo informacioni që mund t'i ndriçonte
akuzat e bëra në raportin e tij. Raporti i zviceranit Marty akuzon kryeministrin
në dorëheqje të Kosovës, Hashim Thaçi, ta ketë udhëhequr një grup të ish-ushtarëve
të UÇK-së në trafikimin me organe njerëzore, armë dhe drogë. Raporti përmend dhe
“Shtëpinë e Verdhë”, për të cilën u fol më parë në librin e ish-kryeprokurores së
Hagës, Carla del Ponte. Hetimet, e zhvilluara në “Shtëpinë e Verdhë” nga Gjykata e
Hagës, por edhe nga EULEX-i, nuk kane nxjerrë ndonjë fakt që do të mund të mbështeste
akuzat se në atë vend është bërë trafikim organesh njerëzore.