Міжнародная праваабарончая арганізацыя асуджае дыскрымінацыю хрысціянаў
Праваабарончая арганізацыя
"Human Rights Watch” асудзіла дыскрымінацыю ў дачыненні да хрысціянаў у Іраку і Егіпце.
У сваім штогадовым дакладзе, апублікаваным у Брусэлі, звяртае ўвагу на рост колькасці
нападаў на прадстаўнікоў рэлігійных меншасцяў у розных частках свету.
Хоць
рэлігійная свабода ў Егіпце з'яўляецца юрыдычна гарантаванай, там пануе атмасфера
нецярпімасці ў дачыненні да хрысціянаў і меншасных мусульманскіх рухаў. Арганізацыя
нагадвае аб нападзе на копцкую царкву ў Александрыі, дзе было забіта 23 асобы. У Егіпце
копты прадстаўляюць каля 10-мільённую меншасць.
"Таксама ў Іраку хрысціяне
і іншыя рэлігійныя меншасці сталі ў мінулым годзе мэтай ўзброеных пераследаў – гаворыцца
ў рапарце. Пасля сакавіцкіх выбараў па палітычных матывах былі забітыя дзесяць хрысціянаў.
Нарастаючы ціск на паслядоўнікаў Хрыста прывёў да таго, што каля 4,3 тысяч з іх былі
вымушаны пакінуць свае дамы і ўцякаць ў паўночную частку краіны. Дырэктар"Human Rights
Watch” Кэнэт Рот заклікаў іракскія ўлады "асудзіць і спыніць гвалт у дачыненні да
хрысціянаў." Ён адзначыў, што, хоць урад ўзяў на сябе абавязак расследваць забойствы,
да гэтага часу вінаватыя не знойдзены.
У 648-старонкавым дакладзе "Human Rights
Watch” падвергла крытыцы парушэнні правоў чалавека ў больш чым 90 краінах і адносіны
Еўрапейскага Саюза да гэтай з'явы. Па дадзеных арганізацыі, замест звяртання ўвагі
на парушэнні правоў чалавека і аказання ціску на краіны адказныя за гэта, Еўрапейскі
саюз часта праводзіць палітыку дыялогу і супрацоўніцтва з іх ўладамі. Праваабарончая
арганізацыя заклікае ЕС да распрацоўкі сур'ёзнай стратэгіі ў дачыненні да краінаў,
якія парушаюць правы чалавека.
Арганізацыя падкрэслівае, што давер да ЕС таксама
залежыць ад таго, як захоўваюцца правы чалавека ў краінах-членах. Паводле арганізацыі
тут расце нецярпімасць ў дачыненні да мігрантаў, мусульманаў і цыган, а таксама існуюць
недахопы ў працэдурах прадастаўлення пытулку.
Сярод краін, дзе мае месца найбольшае
парушэнне правоў чалавека арганізацыя назвала: Кітай, М'янму (Бірму), Узбекістан і
шэраг афрыканскіх краін. У Бірме пасля лістападаўскіх выбараў пануе клімат "прыгнёту
і гвалту." Ва Узбекістане пануе пастаянны пераслед апазіцыі, журналістаў і прадстаўнікоў
этнічных меншасцяў. Арганізацыя крытыкуе сітуацыю ў Судане і Конга, дзе пастаянна
адбываюцца напады на грамадзянскіх асоб, у выніку якіх загінулі ўжо дзесяткі чалавек.
Больш за 2 мільёны асоб былі вымушаныя пакінуць свае дамы, а 145 тысяч эмігравалі
ў суседнія краіны.