U paraqit mesazhi i Papës për ditën botërore të komunikimeve shoqërore: Të krishterët
në ueb me shpresë e krijimtari
(25.01.2011RV)Mesazhi i Papës për 45-vjetorin e Ditës Botërore të Komunikimeve
Shoqërore u paraqit sot paradite në Sallën e Shtypit të Vatikanit. Përveç drejtorit,
atë Federiko Lombardi, folën, ndërmjet tjerëve, edhe kryeipeshkvi Klaudio Maria Çeli
dhe imzot Paul Tighe, përkatësisht kryetar e sekretar i Këshillit Papnor të Komunikimeve
Shoqërore.
Papa ka një vizion pozitiv për mjetet e komunikimit, ndonëse i njeh
thellësisht, me të mirat e kufizimet e tyre: këtë theksoi imzot Çeli, duke shtuar
se ky mesazh i ngarkon të krishterët me detyrën që të japin kontributin e tyre në
‘kontinentin dixhital”: “Në mesazh flitet për stilin e krishterë të pranisë:
e kjo i jep kuptim edhe vetë titullit të mesazhit, që të kujton se dëshmia e veprimtarëve
katolikë nuk mund të kufizohet vetëm në trajtimin e temave fetare, por duhet të manifestohet
në planin e dëshmisë konkrete personale”. Ndershmëri, përgjegjësi, respekt
për tjetrin: ky, shtoi prelati, është stili i pranisë së krishterë në mjetet e komunikimit.
E këtë stil përpiqet ta çojë përpara edhe dikasteri papnor i Komunikimeve Shoqërore. Më
pas atë Lombardi shpjegoi se Papa i ndjek me admirim e interes zhvillimet teknologjike
të komunikimit. Është e vërtetë se Benedikti XVI vijon t’i shkruajë fjalimet tij me
pendë, por kjo nuk e bën më pak të vetëdijshëm për rëndësinë e mjeteve si Youtube,
siç shpjegoi atë Federiko Lombardi: “Kur ia propozuam kanalin Youtube,
ku do të dilte lajmi “Papa për Youtube”, i dhamë një skedë të plotë, që shpjegonte
shumë mirë për çfarë bëhej fjalë e ai vuri BXVI e tij – siglën e tij, që e vë kur
do të thotë se gjithçka është në rregull – se mund të ecet përpara e se është plotësisht
dakord”. Gjatë konferencës së shtypit, u vu në dukje se me rastin e Lumnimit
të Papës Vojtila, bashkëpunimi ndërmjet Sallës së Shtypit të Vatikanit dhe Këshillit
Papnor të Komunikimeve Shoqërore do të thellohet më tej. Më pas, imzot Çeli dha njoftimin
për lindjen e një faqeje të re me lajme nga Vatikani, me përmasa të spikatura multimediale: “Multimediale,
sepse do të përfshijë edhe transmetime të Radio Vatikanit si dhe gjithë shërbimin
posaçërisht të çmuar, të Qendrës Televizive vatikanase. Ju rrëfej, kam një dëshirë:
të jetë operative për Pashkë. Një gjë është e sigurt: po punojmë intensivisht”. Në
përfundim atë Lombardi i njoftoi gazetarët se më 10 shkurt, në Muzetë e Vatikanit,
do të përurohet një ekspozitë kushtuar 80-vjetorit të Radios së Papës.