Mesazh i Papës për Ditën Misionare: ungjillëzimi është shërbimi më i çmuar, që Kisha
mund t’i bëjë njerëzimit
(25.01.2011 RV)Kisha nuk duhet të mbyllet në vetvete, por t’ua shpallë Ungjillin
të gjithë popujve. Këtë kërkon Papa në Mesazhin për Ditën Misionare Botërore, i cili
u bë i njohur sot. Dita do të kremtohet më 23 tetorin e ardhshëm. Benedikti XVI thekson
se ungjillëzimi është një përmasë thelbësore në Kishë, një detyrë, që bëhet edhe më
urgjente në epokën e shekullarizimit të shoqërisë, e cila bën që shumë të jetojnë
sikur Zoti të mos ekzistonte. Ati i Shenjtë nuk mungon të nënvizojë se veprimtaria
misionare duhet shoqëruar gjithnjë nga solidariteti për më të varfërit. “Ungjilli
– shkruan Papa – nuk është pasuri ekskluzive e atyre që e kanë pranuar, por një dhuratë,
një Lajm i Mirë, që duhet komunikuar”. Detyra e çdo të pagëzuari është ta përhapë
këtë Lajm e kjo është urgjente edhe sot. Pas dymijë vjetësh, akoma ka popuj që nuk
e njohin Krishtin e nuk e kanë dëgjuar mesazhin e Tij të shëlbimit. Në dokument,
Benedikti XVI vëren se “shtohen radhët e atyre që, megjithëse e kanë dëgjuar shpalljen
e Ungjillit, e kanë harruar ose braktisur”. Madje, edhe në shoqëritë tradicionalisht
të krishtera, gjejmë njerëz, të cilët e kanë mënjanuar fenë nga jeta e tyre, duke
rënë në relativizëm. Një mendësi kjo, që ngre në qiell mirëqënien, fitimin e lehtë,
karrierën dhe suksesin, duke i vendosur në qendër të jetës e duke mënjanuar vlerat
morale dhe etike. Në një situatë të tillë, misioni i Kishës është t’i nxisë njerëzit
të kthehen në rrugën e këtyre vlerave. Duke cituar Papën Pali VI, Benedikti XVI
nënvizon se veprimtaria misionare duhet të tregojë kujdes të veçantë për solidaritetin.
Është e papranueshme, shkruan Ati i Shenjtë, që veprimtaria ungjillëzuese të harrojë
promovimin njerëzor, drejtësinë, çlirimin nga çdo formë shtypjeje, natyrisht, duke
respektuar autonominë e sferës politike. Çinteresimi për problemet e njerëzimit tregon
vetëm se është harruar mësimi i Ungjillit mbi dashurinë për të afërmin në nevojë.
Në fund, Papa uron që Dita Misionare Botërore të gjallërojë në shpirtin e secilit
dëshirën dhe gëzimin për t’u çuar të gjithëve Krishtin.