Papa Kuesturës së Romës: morali i shëndoshë personal i jep forcë drejtësisë dhe institucioneve.
(21.01.2011 RV)Në shoqërinë e sotme vërejmë një farë dobësimi të parimeve etike
e të sjelljeve morale vetjake, që i japin forcë këtyre parimeve. Këtë pohoi sot Papa
Benedikti XVI, duke pritur në audiencë, në Vatikan, drejtuesit dhe punonjësit e Kuesturës
së Romës. Papa i nxiti të krishterët ta praktikojnë me vendosmëri fenë e tyre në shoqëri,
duke uruar edhe që shoqëria e institucionet publike ta gjejnë përsëri shpirtin e humbur. Edhe
“qyteti i amshuar” ndryshon vazhdimisht. E jo të gjitha ndryshimet janë shembullore.
Benedikti XVI reflektoi pikërisht mbi ndryshimet që vërehen në jetën e përditshme
të Romës e mbi shqetësimet, jo të pakta, që lindin prej tyre: “Këto ndryshime
krijojnë nganjëherë një ndjenjë pasigurie, e cila buron, në radhë të parë, nga gjendja
shoqërore dhe ekonomike e pasigurt. Pasiguria bëhet edhe më e mprehtë për shkak të
dobësimit të perceptimit të parimeve etike, mbi të cilat bazohet drejtësia si dhe
të sjelljeve morale vetjake, që i japin gjithnjë forcë ligjit”. Një prirje
e tillë - vijoi Papa, të krijon përshtypjen se në botën tonë, ku nuk mungojnë shpresat
e mundësitë e reja, duket sikur mungon qëndrimi i drejtë moral e, si pasojë, strukturat,
që janë në bazë të bashkëjetesës nuk arrijnë të funksionojnë plotësisht. Prej këndej
njerëzit mund të tundohen … : “ ... të mendojnë se forcat e mobilizuara për
mbrojtjen e shoqërisë civile nuk janë në gjendje ta kryejnë me sukses detyrën e tyre.
Përballë këtij tundimi, në mënyrë të veçantë ne, që jemi të krishterë, kemi përgjegjësinë
ta praktikojmë me vendosmëri të re fenë tonë e të sillemi në përkim me parimet e saj,
duke vijuar me guxim veprimtarinë , gjithnjë pranë njerëzve, në gëzimet e vuajtjet
e tyre, në orët e lumtura e në orët e errëta të jetës tokësore”. Benedikti
XVI u rikthye tek tema, e trajtuar shumë herë, e përmasës subjektive të jetës. Duke
e përqendruar vëmendjen mbi këtë aspekt, Papa theksoi se është mirë të vihet vazhdimisht
në dukje vlera e ndërgjegjes njerëzore. Por në këtë drejtim – shtoi - jemi para një
rreziku të madh: “Në mendimin modern është krijuar një viziom, i cili e ngushton
shumë ndërgjegjen; sipas tij, nuk ka referime objektive, që përcaktojnë çka vlen e
çka nuk vlen, çka është e vërtetë e çka nuk është; metri me të cilin duhet matur ndërgjegjja
është vetë individi, me hamendjet e përvojën e tij; prej këndej, secili ka të vërtetën
e vet, moralin e vet. Pasoja më e dukshme e një mendësie të tillë është prirja për
ta kufizuar fenë e moralin në jetën shpirtërore të subjektit, në sferën e tij private:
fesë, me vlerat e saj e me sjelljet e saj, nuk i njihet më e drejta të ketë vend
në jetën civile e publike”. E kështu - vijoi të theksojë Papa - jemi përballë
paradoksit të shoqërisë aktuale, në të cilën i jepet rëndësi e dorës së parë pluralizmit
e tolerancës, e njëkohësisht: “Prirjes progresive për ta mënjanuar fenë e
për ta konsideruar si një gjë pa rëndësi, madje, në një farë mënyre, si mish i huaj
në botën e qytetëruar, që duhet të ndikojë sa më pak të jetë e mundur mbi jetën e
njeriut, e që, prandaj duhet kufizuar. Përkundrazi, për ne të krishterët, “ndërgjegjja”
ka kuptimin e aftësisë së njeriut për ta njohur të vërtetën, e akoma para se ta
njohë, për ta ndjerë fort nevojën e saj, për ta kërkuar e për ta gjetur”. Njeriu
– pohoi Benedikti XVI - është shprehje e planit të dashurisë e të vërtetësisë: Zoti
e planifikoi, në se mund të shprehemi kështu, me shpirt, me ndërgjegje, që të mund
të kultivojë vetveten e shoqërinë njerëzore: “Sfidat e reja, të cilat duken
në horizont, kërkojnë që Zoti e njeriu të ritakohen, që shoqëria e institucionet publike
të rigjejnë shpirtin e tyre, rrënjët e tyre shpirtërore e morale, për t’i dhënë forcë
të re vlerave etike e juridike e, prej këndej, edhe veprimtarisë praktike. Feja e
krishterë e Kisha vijojnë të ofrojnë kontributin e tyre për promovimin e së mirës
së përbashkët dhe për progresin e vërtetë njerëzor”. Duke e njohur nga
afër punën e kryer prej Kuesturs së Romës, Papa e përfundoi fjalimin me ftesën drejtuar
punonjësve të saj për të dhënë një shembull sa më pozitiv, duke jetuar të përditshmen
sipas parimeve të fesë së krishterë e duke i harmonizuar mjetet e sistemet e sigurimit,
me virtytet njerëzore si durimi, dëshira për të bërë mirë, flijimi e gatishmëria
për ta dëgjuar e për ta ndihmuar tjetrin.