Kardinali Tarçizio Bertone nuncëve të ardhshëm: hiqni dorë nga planet personale e
ndiqni Krishtin!
(19.01.2011 RV)“Edhe puna juaj e zyrës, e kryer me përvujtëri e mençuri, mund
të kontribuojë në impenjimin e Selisë së Shenjtë për ndërtimin e një bote më të drejtë
e më vëllazërore, në emër të Krishtit”. Këtë pohoi sekretari i Shtetit të Shenjtërisë
së Tij, kardinali Tarçizio Bertone, në homelinë e lutjeve mbrëmësore, kremtuar dje
pasdite, në sa Kisha përkujtonte Shën Andoun Abat, pajtor i Akademisë Papnore kishtare,
ku formohen nuncët, diplomatë të ardhshëm apostolikë. Kardinali Tarçizio Bertone
theksoi, në vijim, sa rëndësi ka përgatitja e nuncëve mendjendritur e largpamës, të
mbështetur nga bashkëpunëtorë, që kanë vizion të gjërë për Kishën, një Kishë, e cila
jeton në realitetin e botës e kërkon ta orientojë drejt përsosurisë, drejt Krishtit.
Kardinali, më pas, u ndal posaçërisht tek dy aspekte themelore për formimin e përshtatshëm
gjatë viteve të studimit në Akademi. U kujtoi nuncëve të ardhshëm se duhet të heqin
dorë nga vetvetja, nga planet e tyre personale, për të ndjekur pas Krishtin, me të
njëjtin zell, që pati Shën Andou Abat i cili, i shtyrë nga dashuria për Jezusin, la
gjithçka e iu kushtua plotësisht lutjes e pendesës. Jezusi u kujton qartë të gjithë
atyre, që dëshirojnë ta ndjekin pas: “Rrugë të mesme s’ka: o me Të, o kundra Tij!”.
Po që të jesh me Të, nuk duhet të jesh me interesat tuaja. Të jesh me Të, duhet të
heqësh dorë nga të menduarit e nga të jetuarit sipas planeve personale. Kardinali
i nxiti meshtarët e Akademisë të kujdesen, mbi të gjitha, për të jetuar me e pranë
Krishtit e Kishës, në bashkim me Atin e Shenjtë. Duke kujtuar shërbimin krejt të veçantë
në përfaqësitë papnore, kardinali Bertone theksoi se Kisha ka nevojë për meshtarë
të rinj, që e kalojnë gjithë ditën me lutje, me punë, me impenjim pranë kishave vendase,
me këshilla. Ata duhet të shquhen edhe për shpirtin e vetmohimit, posaçërisht në orët,
shpesh dramatike, të kombieve ku shërbejnë e të popujve të tyre. S’ka gëzim më të
madh – theksoi me forcë kardinali Bertone – se të jesh dishepull i Krishtit e shërbëtor
i Papës. Eshtë gëzim të vozitësh, së bashku me shumë vëllezër, në barkën e Shën Pjetrit,
duke përballuar me sukses erërat e kundërta e dallgët e historisë, sepse në timon
është vetë Zoti!