Заўтра пачынаецца Тыдзень малітваў аб адзінстве хрысціянаў
Экуменічныя малітвы
ў храмах розных канфесій і роздум аб гісторыі і сучаснасці Іерусаліму - гораду, дзе
2000 гадоў таму нарадзілася хрысціянства - з'яўляюцца асноўнымі элементамі сёлетнега
Тыдня малітваў аб адзінстве хрысціянаў. Ён пачынаецца заўтра, 18 студзеня.
Матэрыялы
для Тыдня ў гэтым годзе падрыхтавалі хрысціяне з Іерусаліму, якія выбралі таксама
яго дэвіз, словы з Дзеяў Апосталаў: “Яны заставаліся вернымі вучэнню Апосталаў і супольнасці,
ламанню хлеба і малітвам” (пар. Дз 2, 42).
Падчас экуменічных набажэнстваў
мясцовыя іерархі на ўсім свеце будуць абвяшчаць казанні ў храмах іншых хрысціянскіх
супольнасцяў. Паводле традыцыі, падчас экуменічнага Тыдня на набажэнствы, якія арганізуюцца
ў храмах розных канфесій, запрашаюцца прадстаўнікі братніх Касцёлаў. Яны не толькі
прымаюць удзел у супольнай малітве але і абвяшчаюць казанні.
У Беларусі таксама
пройдуць адмысловыя набажэнствы з гэтай нагоды. У мінскай архікатэдры Імя Найсвяцейшай
Панны Марыі ў межах Тыдня малітваў аб адзінстве хрысціянаў 22 студзеня гг. у 19.30
адбудзецца супольная малітва прадстаўнікоў розных канфесій Беларусі.