Papa në 100-vjetorin e Institutit Papnor Kishtar Polak uron që ai të formojë meshtarë
të përgatitur e të bashkuar me qendrën e krishterimit
(17.01.2011 RV)Kisha ka nevojë për meshtarë të përgatitur, të dashuruar me
të Vërtetën e Krishtit, të cilën duhet ta ndajnë me të gjithë, duke i qëndruar besnikë
selisë së Shën Pjetrit. Ky ishte thelbi i fjalës së Papës në kremtimin e 100-vjetorit
të themelimit të Institutit Papnor Kishtar Polak, mësuesit e studentët e të cilit
i priti në audiencë sot paradite. Të përgatitur si duhet, pasi vetëm një meshtar
i formuar mund të jetë një “Krisht tjetër” në botë, tha Papa. E njëkohësisht, të lidhur
pazgjidhshmërisht me Atin e Shenjtë, pasi kjo lidhje është garanci se frytet e prodhuara
prej tyre vijnë nga pema, ku i ka rrënjët e lashta krejt Kisha: “Kisha ka nevojë
për meshtarë të përgatitur mirë, të pasur me atë dituri, që fitohet në miqësinë me
Krishtin Zot, duke u ushqyer vazhdimisht në Tryezën eukaristike e në burimin e pashterrshëm
të Ungjillit të Tij. Mësoni të mbështeteni vazhdimisht e të frymëzoheni gjithmonë
nga këto dy burime të pazëvendësueshme për jetën e shërbimin e tuaj, për dashurinë
e sinqertë ndaj së Vërtetës, që sot jeni të thirrur ta thelloni edhe përmes studimit
e punës shkencore e që nesër, do ta ndani edhe me të tjerë”. Ky kërkim i së
Vërtetës, nënvizoi Papa, stimulohet e pasurohet nga afërsia me Selinë Apostolike.
Meshtarët duhet ta duan e të kenë përkushtim për figurën e Shën Pjetrit, si edhe t’i
shërbejnë Kishës me bujari: “Të qëndrosh i lidhur me shën Pjetrin, në zemër
të Kishës, do të thotë të pranosh me mirënjohje se je brenda historisë shumëshekullore
të shëlbimit, e cila ka arritur te ju falë një hiri shumëformësh. Jeni të thirrur
të merrni pjesë aktive në këtë histori, në mënyrë që ajo, si një pemë e shëndetshme,
të japë gjithnjë frytet e saj të çmuara”. Instituti Papnor Polak i ka fillesat
në vitin 1910. U themelua nga prelati polak, imzot Jozef Sebastian Pelczar e më pas,
u miratua nga Papa Piu X, shenjt i Kishës Katolike.