Liturgjia e Fjalës së Zotit e dielës së 2-të gjatë vitit kishtar ‘A’. ‘Ja Ai që ia
shlyen mëkatin botës!’
Ja përsëri në takimin tonë javor të së shtunës me Fjalën e Zotit të së dielës, kësaj
radhe do të dëgjojmë e meditojmë së bashku leximet biblike të Liturgjisë së Fjalës
Hyjnore të dielës së dytë gjatë vitit kishtar, ciklit të parë, sipas kalendarit të
liturgjisë kishtare. Pas festës së Pagëzimit të Jezu Krishtit, që mbylli kohën
e Krishtlindjes, me këtë të diele hyjmë nè Kohën e Rregullt Gjatë Vitit, që vijon
të përqendron vështrimin tonë mbi Epifaninë – Dëftimin e Zotit, që vazhdon pra të
përqendrohet mbi dëftimin e misterit të Jezu Krishtit. Këtë të diel, pjesa e Ungjillit
na ofron dëshminë e Gjon Pagëzuesit që na fton ta njohim në Jezusin qengjin e Zotit,
që i heq mëkatin botës sepse e merr mbi vete. Atë në mënyrë të posaçme kundron Gjon
Pagëzuesit është marrëdhënia ndërmjet Jezusit e Shpirtit Shenjt. E sheh Shpirtin Shenjt
duke zbritur e ndenjur mbi Jezusin, ashtu si dëshmitari tjetër i madhe i Ungjillit
të IV, nxënësi i dashur, duke ndenjur tek këmbët e kryqit do ta shohë Shpirtin që
përhapet nga Jezusi mbi të gjithë ne, në shenjën e ujit e të gjakut të shpërthyer
nga kraharori i tij i hapur. Gjon Pagëzuesi na fton të vështrojmë Qengjin e Hyjit
ashtu si na fton edhe nxënësi i dashur ta drejtojmë shikim e vështrimin tonë drejt
“Atij që e shporuan”. Vetëm te këmbët e kryqit do të kujtojmë se në çfarë kuptimi
Jezusi është qengji i vërtetë i flijuar që na liron nga mëkati. Falë atij shpëtimi
mund të mbërrijë deri në skajet e tokës (Leximi I) e ne, siç u kujton Korintianëve
shën Pali, (Leximi II) kemi mundësinë të shenjtërohemi. Pra, Liturgjia e Fjalës
së Zotit e kësaj së diele na paraqet Jezusin porsi “qengjin e Zotit, që shlyen mëkatin
e botës”. Figura ungjillore na kujton dy temat biblike: nga njëra anë kemi figurën
profetike të ‘Shërbëtorit të Hyjit’, vegël çlirimi dhe shembull të një jete të dhuruar
për të tjerët; në anën tjetër, figura po kështu çlirimtare, e qengjit pashkor. Jezusi
pra paraqitet si shpëtimtar, çlirimtar i ri, me të cilin është e lidhur shpresa e
popullit të ri të Zotit. Në këtë perspektivë edhe Gjon Pagëzuesi e paraqet Krishtin
në pjesën ungjillore të kësaj së diele. Ai, Gjoni është dëshmitari dhe shembulli i
parë i dëshmisë së krishterë. Gjoni di ta shquaj e ta kuptoj në personin e Jezusit
thelbin e mistershëm të misionit të tij hyjnor e bëhet zë që i dërgon njerëzit tek
Ai dhe sot na fton edhe neve ta ndjekim Mësuesin e Shpëtimtarin e jetës, Jezu Krishtin
Zot. Liturgjia e Fjales Lexim prej Isaisë profet Hyji
më tha: “Shërbëtori im je, o Izrael, në të cilin do ta dëftoj lavdinë time!” E tani
thotë Zoti që më trajtoi që nga kraharori shërbëtor për vete, për t’ia kthyer Jakobin
Atij, për ta mbledhur rreth tij Izraelin. U bëra i lavdishëm ndër sytë e Zotit, Hyji
im u bë fuqia ime. Ai më tha: “Tepër pak është të më jesh shërbëtor për t’i rilindur
fiset eJakobit, për t’i riatdhesuar Tepricat e Izraelit: por të caktoj të jesh drita
e popujve që shëlbimi im të arrijë në skaj të tokës!” Fjala e Zotit
Psalmi
40 (39) Ref: Ja, po vij, o Zot, për ta kryer vullnetin
tënd _______________ Me shpresë të gjallë shpresova në Zotin dhe
ai u prirë drejt meje, e vështroi britmën time. Në gojë më vuri një këngë të
re, himnin e Zotit, Hyjit tonë. _____________ Fli e dhurata ti nuk do, vetë
ma zbulove vullnetin tënd: fli shkrumbimi e pendestare nuk kërkon, atëherë
thashë: “Ja, po vij unë. _____________ Në Librin e Ligjit shkruan për mua: Të
kryej vullnetin tënd, Hyji im, dëshiroj, Ligji yt është në thellësinë e zemrës
sime”. _____________ Drejtësinë tënde e shpalla në kuvendin e dheut, shih,
nuk i mbaj të mbyllura buzët, o Zot, ti e di. _____________
Leximi i
dytë (1 Kor 1, 1-3) Shën Pali
përshëndet të krishterët e Korintit si ai që është dërguar nga Krishti. Ai sheh në
atë bashkësi të Korintit Kishën e Hyjit dhe rinjeh në anëtarët e saj personat e thirrur
në shenjtërim dhe të bashkuar në besimin e atyre që thërrasin emrin e Jezusit në botë.
Lexim
prej Letrës së parë të shën Palit apostull
drejtuar Korintasve
Pali, për vullnet të Hyjit, i grishur
të jetë apostull i Krishtit Jezus, edhe vëlla Sosteni, Kishës së Hyjit që është
në Korint, të shenjtëruarve në Krishtin Jezus, të grishurve të jenë shenjtër, bashkë
me të gjithë ata, që në cilindo vend e thërrasin Emrin e Zotit tonë, Jezu Krishtit,
Zotit të tyre dhe tonë. Paçi hir e paqe prej Hyjit, Atit tonë, dhe prej Zotit Jezu Krisht!
Fjala
e Zotit
ALELUJA, Aleluja. E Fjala u bë njeri, e banoi
ndër ne. Atyre që e pranuan u dha zotësinë të bëhen bijtë e Hyjit. Aleluja.
Ungjilli (Gjn 1, 29-34)
Në aramaisht fjala shërbëtor do të thotë edhe qengj. Në
Ungjill Jezusi është quajtur “Qengji i Hyjit” nga Gjon Pagëzuesi. Në Besëlidhjen
e Vjetër qengji i Pashkëve është simbol i shpëtimit të Izraelit. Jezusi si Shpëtimtar
duhet të kalojë përmes Pashkëve të tij të vdekjes dhe të ringjalljes për tu pagëzuar
në Shpirt. Për të qenë besnikë ndaj Ungjillit nuk mjafton vetëm të zhytemi
në ujin pagëzimor, por duhet të lejojmë të mbushemi nga zjarri i Shpirtit.
Leximi
i Ungjillit shenjt sipas Gjonit
Në atë kohë, Gjoni e pa Jezusin duke
ardhur kah ai e tha: “Ja, Qengji i Hyjit! Ky ia shlyen mëkatin botës! Ky është ai,
për të cilin thashë: ‘Pas meje vjen një njeri, i cili është më i madh se unë, sepse
ishte përpara meje!’ Nuk e kam njohur as vetë, por arsyeja pse erdha e jam duke pagëzuar
me ujë është që ky t’i zbulohet Izraelit.” Gjoni dëshmoi edhe: “E pashë Shpirtin
Shenjt tek zbriti prej qiellit porsi pëllumb dhe zuri vend mbi të. Unë nuk e njihja
atë, porse Ai që më dërgoi të pagëzoj me ujë, Ai edhe më tha: ‘Në atë që të shohësh
se zbret Shpirti Shenjt dhe zë vend në të, ai është që pagëzon me Shpirtin Shenjt.’
Unë e pashë dhe dëshmoj: Ky është Biri i Hyjit.” Fjala e Zotit E tani
më hollësisht këtu mund ti dëgjoni leximet biblike e pastaj homelinë......