Të krishterët mund të arrijnë bashkimin e plotë: ndjeti i lutjes misionare të Papës
për muajin janar
(13.01.2011 RV)Gjatë muajit janar, Papa Benedikti XVI lutet që të krishterët
të arrijnë bashkimin e plotë. Ky është ndjeti i lutjes misionare të Atit të Shenjtë
e kjo temë do të jetë në qendër të Javës së lutjes për bashkimin e të krishterëve,
në program nga data 18 deri më 25 janar. Bashkimi i të krishterëve e bën më të
besueshëm e më të frytshëm mesazhin e Ungjillit. Është dhurata, që kërkojnë besimtarët
nga Zoti, në mënyrë që historia të ndriçohet nga fjalët e Jezusit në prag të vdekjes:
“Qofshin një gjë e vetme…që bota të besojë”. Detyrë e vështirë kjo, por entuziazmuese,
siç kujtoi Benedikti XVI më 25 janar të vitit 2010, në përfundim të javës për bashkimin
e të krishterëve: “Fatkeqësisht, nuk mungojnë çështje, që e ndajnë njërin nga
tjetri e, që shpresojmë të zgjidhen përmes lutjes e dialogut, por thelbin e mesazhit
të Krishtit mund ta shpallim sëbashku: atësinë e Zotit, fitoren e Krishtit mbi mëkatin
e mbi vdekjen me Kryqin dhe ringjalljen e Tij, besimin në veprën shndërruese të Shpirtit
Shenjt”. Në lutje, bashkësitë e krishtera e venë veten përballë Zotit, duke
u ndërgjegjësuar për kontradiktat, që lindin nga ndarja e përçarja. Të krishterët
– uroi Benedikti XVI në audiencën e përgjithshme të 23 janarit 2008 – duhet ta dëshmojnë
bashkimin e tyre në një botë, që vuan për shkak të mungesës së Zotit: “Bota
vuan për mugesën e Hyjit, për pamundësinë që t’i afrohet Zotit, ka dëshirë ta njohë
fytyrën e Zotit. Por si mund ta njohin njerëzit e sotëm këtë fytyrë të Hyjit në fytyrën
e Jezu Krishtit, nëse ne të krishterët jemi të ndarë, nëse njëri flet kundër tjetrit,
nëse njëri është kundër tjetrit? Vetëm të bashkuar mund t’i tregojmë vërtet kësaj
bote – e cila ka nevojë – fytyrën e Zotit, fytyrën e Krishtit”. Sprovat e
vështirësitë i shtyjnë dishepujt e Krishtit të kenë durim e të vazhdojnë rrugën e
nisur, duke e kërkuar bashkimin vëllazërisht. E nuk duhet të lodhen së kërkuari, pati
theksuar Papa në Lutjen e Engjëllit të Tënzot të 22 janarit 2006: “Nëse do
ta bëjmë këtë me fe, mund të jemi të sigurtë se kërkesa jonë do të dëgjohet. Nuk e
dimë as si e as kur, sepse nuk na takon neve ta dimë, por nuk duhet të dyshojmë se
një ditë do të jemi “një gjë e vetme”, ashtu si Jezusi dhe Ati janë të bashkuar në
Shpirtin Shenjt”. Gjatë asamblesë së përgjithshme të Këshillit Papnor për
Bashkimin e të Krishterëve, më 17 nëntor 2006, Ati i Shenjtë shpjegoi se dialogu ndriçohet
nga “ekumenizmi i dashurisë”, i bazuar në të vërtetat e fesë: “Ai, që duhet
nxitur me çdo mënyrë, është ekumenizmi i dashurisë, që rrjedh drejtpërdrejt nga urdhërimi
i ri, lënë dishepujve prej Jezusit. Dashuria, e shoqëruar me gjeste koherente, krijon
besim, bën të hapen zemrat dhe sytë. Dialogu i bamirësisë, për natyrën e vet, nxit
dhe ndriçon dialogun e së vërtetës”. Uniteti në Kishë i ka rrënjët në bashkimin
e saj me Krishtin. Arritja e bashkimit të plotë mbështetet në lutjen e në premtimin
e Jezusit, nënvizoi Benedikti XVI më 29 qershorin e kaluar, në festën e Shën Pjetrit
e të Shën Palit.