Tunizi: Vazhdojnë trazirat. Presidenti urdhëron uljen e çmimeve.
(13.01.2011 RV)Natën e kaluar në kryeqytetin e Tunizisë, Tunis, vazhduan përleshjet
mes policisë dhe manifestuesve që zbritën në shesh duke shkelur ligjin e ndalimqarkullimit.
Po ashtu edhe sot paradite disa qindra protestues dolën prap në qendër të kryeqytetit
për të manifestuar përpara ambasadës franceze dhe më pas u përpoqën të shkojnë në
Medinë, pjesa e vjetër e qytetit. Njoftohet se marshimi i tyre u shpërnda vetëm pas
ndërhyrjes së forcave speciale të policisë me gaz lotsjellës. Më pas policia rrethoi
edhe selinë e Bashkimit të Përgjithshëm të Punëtorëve Tunizianë (UGTT), sindikata
kryesore, e cila është rreshtuar përkrah qytetarëve që kërkojnë drejtësi për viktimat
por edhe për papunësinë dhe rritjen e çmimit të bukës. Nga ana tjetër, presidenti
Ben Ali urdhëroi sot që çmimet e mallrave ushqimore jetike të ulen detyrimisht.