Vazhdon të rëndohet bilanci i viktimave të ndeshjes ndërmjet manifestuesve dhe forcave
të rendit, që vazhdon prej katër ditësh në Tunizi. Edhe Ministria e Brendshme pranoi
se numri i të vdekurve ka arritur në 18 vetë. Por gjendja duket se është edhe më e
rëndë. Sipas sindikatës kryesore kombëtare, gjatë tri ditëve të fundit kanë humbur
jetën mëse 50 vetë, shifër e konfirmuar edhe nga Federata Ndërkombëtare për të Drejtat
e Njeriut, organizatë me seli në Francë ku bëjnë pjesë 164 lëvizje humanitare. Amnesti
Interneshënëll flet për dhjetra të vdekur. Dita e sotme dukej e qetë në kryeqytetin
Tunis, pas mbylljes së shkollave dhe të universiteteve me urdhër të presidentit Ben
Ali. Por fjalimi i djeshëm kreut të shtetit për kombin, në të cilin ai i akuzoi manifestuesit
për “akte terroriste”, shkaktoi tension në qytete të ndryshme, ku policisë iu desh
të përdorë gazin lotsjellës për të shpërndarë protestuesit e zemëruar. Presidenti
premtoi edhe se brenda vitit 2012 do të krijohen 300 mijë vende pune, por njerëzit
nuk i besojnë. Kujtojmë se revolta në Tunizi dhe në Algjeri filloi pas rritjes
së çmimit të bukës, shenjë e gjendjes aspak të mirë ekonomike të këtyre vendeve dhe
shtimit të papunësisë.