Me solemnitetin e Dëftimit të Zotit, përfundoi edhe Viti jubilar në Vietnam.
(07.01.2011 RV)Në Shenjtëroren La Vang u mbyll, me një ceremoni solemne, kryesuar
nga i dërguari i posaçëm i Atit të Shenjtë, kardinali Ivan Dias, prefekt i Kongregatës
për Ungjillëzimin e Popujve, Viti Jubilar i Kishës së Vietnamit, kremtuar me rastin
e 350-vjetorit të krijimit të vikariateve të para apostolike dhe të 50-vjetorit të
themelimit të hjerarkisë katolike në vend. Nuk ishte rastësi zgjedhja e ditës.
Ipeshkvijtë e Vietnamit vendosën ta kremtojnë përfundimin e Vitit Jubilar të Kishës
vendase në Solemnitetin e Dëftimit të Zotit, me një qëllim të caktuar. Zoti është
dashuri – shpjegoi kardinali Dias gjatë homelisë – na u dëftua edhe ne në Vetjen e
të Birit në Betlehem, dymijë vjet më parë; e vijon t’u dëftohet të gjithë atyre, që
dëshirojnë ta pranojnë në jetën e përditshme. Jezusi është dhurata më e madhe, që
Hyji Atë i bëri mbarë njerëzimit. E njerëzimi nuk mund të mos e falënderojë e të mos
i përgjigjet ftesës së tij për ta ndarë edhe me vëllezërit, që nuk e njohin akoma,
këtë dhuratë të paçmuar. Kështu u shpreh i dërguari i Papës, kardinali Dias, i cili
në vijim falënderoi misionarët guximtarë, ardhur në Vietnam nga vende të largëta,
për t’u kumtuar vietnamezëve Lajmin e Mirë të Krishtit, Shëlbuesit të botës. Në
vendin aziatik jetojnë gjashtë milionë katolikë të cilët, duke u nisur nga shembulli
i barinjve të tyre, duhet të përpiqen me gjithë shpirt për të bërë kthesë personale,
duke ecur në rrugën e shenjtërisë, të lumnimit të Zotit, të ungjillëzimit, të kumtimit
të Ungjillit me vepra e me jetën e përditshme. “Ju jeni kripa e tokës... drita e botës”.
Duke marrë shtytje nga fjalët e Ungjillit sipas Mateut, kardinali Dias kujtoi edhe
117 martirët e Kishës vietnameze. Kjo Kishë, sot, më shumë se kurrë, ka nevojë që
bijtë e saj ta jetojnë fenë me guxim në gjirin e shoqërisë, në mënyrë që të arrijë
në zemër të njerëzve, të cilët nuk e njohin akoma Krishtin. E pikërisht shenjtëria,
dashuria e krishterë, veprat e bamirësisë, mbrojtja e familjes, edukimi i të rinjve,
lutja e përditshme, ushqimi i shpirtit e pjesëmarrja në Liturgji e në Sakramente,
posaçërisht në Eukaristi, do të vihen posaçërisht në dukje në dokumentin përfundimtar,
që do të hartohet si bilanc i asamblesë së Popullit të Zotit, kremtuar në Hochiminville,
nëntorin e kaluar.