Kishat lindore e kremtojnë Krishtlindjen në atmosferën e masave të rrepta të sigurimit.
Në Egjipt, shumë myslimanë solidarizohen me koptët.
(07.01.2011 RV)Kishat lindore, që ndjekin kalendarin julian, e kremtuan sot
Krishtlindjen. Vëllezërve e motrave të këtyre bashkësive, Benedikti XVI u shprehu
dje, pas lutjes së Engjëllit të Tënzot, urimet e tij më të përzemërta. Mirësia e Zotit
– tha Papa – ju forcoftë fenë, shpresën e dashurinë e i ngushëlloftë bashkësitë, që
kalojnë çaste vërtet të vështira. Kishat lindore e kremtojnë sot lindjen e Krishtit,
duke ia besuar çdo shpresë Shëlbuesit, Princit të paqes. Por kremtimet e solemnitetit
të madh, në shumë vende rrethohen me masa të forta sigurimi, nga frika e atentateve
të mundshme. Në Lindjen e Mesme besimtarët u mbrojtën nga ushtarakë, të veshur
si të ishin duke u nisur për betejë. Në Irak, e pikërisht në qytetin e Mosulit,
forcat e sigurimit gjetën disa bomba e rripa të ngarkuar me lëndë plasëse, pranë ndërtesës
së Kishës ortodokse kaldeje. Edhe në Evropë, policët vijojnë t’i ruajnë hyrjet
në vendet e kultit. Alarmi bëhet edhe më i mprehtë, për shkak të kërcënimeve të integralistëve
të lidhur me Al Kaedën. Por frika nuk mundi t’i ndalojë besimtarët. Në Egjipt, posaçërisht,
bashkësia kopte mori pjesë mbrëmë në kremtimin e Mesnatës, e mbrojtur nga forca të
shumënumërta të sigurimit. Shenuda III, Papë i Aleksandrisë e Patrik i Episkopatit
të Shën Markut, kujtoi, me dhimbje, në homeli, viktimat e atentatit të vitit të ri,
që i kushtuan jetën 23 vetëve, pa harruar edhe gjithë të krishterët e tjerë, të vrarë
në vende të ndryshme të botës. Edhe popullsia jo e krishterë u manifestoi koptëve
afërsinë e saj. Në Egjipt, shumë besimtarë myslimanë morën pjesë në kremtime, për
të nënvizuar, kështu, konkretisht, solidaritetin. Masa të rrepta sigurimi u morën
edhe në Rusi. Patriku i Moskës dhe i gjithë Rusive, Kirill, e kremtoi Meshën e Mesnatës
në Katedralen e Krishtit Shëlbues, në prani të mijëra besimtarëve, ndërmjet të cilëve,
presidenti i Federatës Ruse, Dimitri Medvjedjev. Gjatë homelisë, Patriku theksoi se
Zoti, duke iu përgjigjur lutjeve, hyn në jetën e njeriut, e merr për dore, ia forcon
mendjen, shpirtin e trupin. Sot, më shumë se kurrë – përfundoi Patriku – njeriu ka
nevojë për ndihmën e Zotit, për dashurinë e tij, për mëshirën e tij. Në bashkësitë
kopte, posaçërisht, gjatë kremtimit të Krishtlindjes, besimtarët u lutën për viktimat
e masakrës të natës së vitit të ri në Aleksandri. Të dëgjojmë, në mikrofonin tonë,
ipeshkvin e dioqezës kopto-ortodokse të Shën Gjergjit, në Romë, imzot Barnaba El
Soryany: Përgjigje: - Ne e kremtuam Krishtlindjen
natën, me trishtim e me lot në sy, duke kujtuar atentatin e vitit të ri, në të cilin
gjetën vdekjen 23 vetë nga bashkësia jonë e Aleksandrisë. Sot është takimi me familjet,
por këtë vit për Krishtlindje nuk do të ketë urime, sepse për ne, kjo është Krishtlindje
pa lumturinë e gëzimin e Krishtlindjeve të kaluara.
Pyetje: - Krishtlindje,
e kremtuar më tepër në shpirt, me lutje, me mendje e zemër pranë bashkësisë së martirizuar
të Alesandrisë së Egjiptit....
Përgjigje: - Sigurisht, ishte
Krishtlindje me drita të shuara; vetëm ceremoni liturgjike e Krishtlindjes, vetëm
ceremoni.
Pyetje: - Dje edhe Papa, gjatë lutjes së Engjëllit të
Tënzot, i kujtoi Kishat lindore. Ati i Shenjtë u shprehu ngushëllimet më të ndjera
bashkësive të vëna në sprovë të rëndë edhe në këto ditë, që duhet të ishin plot gëzim
e shpresë...
Përgjigje: - Jemi tepër, tepër mirënjohës ndaj
Papës Benedikti XVI, për gjithçka bën në ndihmë të të krishterëve të Lindjes së Mesme:
mblodhi Sinodin e posaçëm për Lindjen e Mesme, i ndihmon bashkësitë tona, bëhet zëdhënës
i tyre në gjithë bashkësinë ndërkombëtare, për t’i mbrojtur besimtarët tanë në mbarë
Lindjen e Mesme. Duhet kujtuar, pastaj, se dialogu ndërmjet katolikëve e ortodoksëve
ka nisur që në vitin ’73, kur Shenjtëria i Tij, Papa Shenuda pati ardhur në Vatikan,
në kohën e Papës Pali VI. Kemi bërë hapa të rëndësishme përpara e shikojmë se tani,
në dialogun ndërmjet Kishave – faleminderit Zotit – është bërë shumë, shumë. E mendojmë
se me kohë, dialogu do të shkojë edhe më përpara. Pyetje:
- Siç e thatë edhe ju, e sivjetmja ishte Krishtlindje me drita të shuara. Por,
cila është drita, që nuk mund të shuhet as në këtë çast tejet të vështirë?
Përgjigje:
- Ne u urojmë të gjithë të krishterëve të botës, një vit të qetë, paqësor.
E përhapim, në kor, zërin e paqes në tërë botën. Mesazhi ynë këtë vit është: “T’i
jepet fund dhunës!”. “T’i jepet fund terrorizmit!”. “T’i jepet fund gjakut!”. Unë
shtoj se të dielën e ardhshme, më 9 janar, nga ora 14.00 deri në orën 16.00, bashkësia
kopte ortodokse kristiane e Romës, do të bëjë një manifestim në Sheshin e Republikës,
për të shprehur kështu, solidaritetin me vëllezërit e krishterë të Egjiptit.