Trëndafila për koptët e Aleksandrisë në meshën e Venedikut
(06.01.2011 RV)Në solemnitetin e Dëftimit të Zotit, Mesha e Shenjtë në Bazilikën
e Shën Markut në Venedik, kryesuar sot në orën 10.30, nga Patriku, kardinali Anxhelo
Skola, është tradicionalisht rasti i bashkimit në lutje me misionarët venedikas, meshtarë,
rregulltarë e laikë, që shërbejnë në vende të ndryshme të botës. Bashkësia katolike
u lut edhe për të krishterët e persekutuar e për martirët, sidomos për viktimat e
atentatit në kishën kopte të Aleksandrisë së Egjiptit. 12 trëndafila të kuq u çuan
gjatë meshës në elterin e Shën Markut e në fund të kremtimit, u vendosën në elterin
e Zojës ‘Nicopeia’, “veprimtares së fitores”, ikonë që nderohet jashtëzakonisht nga
venedikasit, sëbashku me atë të Zojës së Shëndetit. Ky gjest i përket traditës së
Venedikut e zakonisht bëhet më 25 prill, në festën e Shën Markut, pajtorit të qytetit.
Kësaj radhe, trëndafilat u bënë pjesë e liturgjisë për të kujtuar të krishterët e
vrarë në Egjipt. Edhe Kisha aleksandrine, ashtu si ajo e Venedikut, ka lindur pas
veprimtarisë misionare të shën Markut Ungjilltar.