Më 31 dhjetor Kisha katolike përkujton Shën Silvestrin Papë.
(31.12.2010RV)Shën Silvestri është shenjt shumë i njohur. Emri i tij është bërë tashmë
sinonim i festës së fundit të Vitit, jo sepse ishte njeri gazmor, ashtu si është festa
e ndërrimit të viteve, që i mbush njerëzit me shpresa të reja për një kohë të re,
por thjeshtë sepse vdiq më 31 dhjetor të vitit 335 dhe nisi menjëherë të nderohej
si shenjti i Romës. Me emrin e tij lidhen ngjarje të rëndësishme për Qytetin e
Amshuar e për krishterimin. Silvestri qe papë në kohën e Perandorit Kostandin, që
u njohu të krishterëve lirinë e kultit. Gjatë papnisë së tij, reformoi kalendarin
dhe përdori për herë të parë shprehjen e përgjithshme “ditët e javës”, në sa para
tij i kushtoheshin perëndive pagane. Është Papa që në vitin 325 thirri Koncilin
I ekumenik të Nikesë, gjatë punimeve të të cilit u miratua ‘Besojma’ e cila, duke
iu kundërvënë doktrinës së Arit, ripohon hyjninë e Jezu Krishtit: “Hyj i vërtetë prej
Hyjit të vërtetë, i lindur e jo i krijuar, me të njëjtën natyrë me Atin”. Papa
Silvestri nuk pati kurrfarë mundësie të ishte i pranishëm në diskutime: vendimet që
u morën, iu komunikuan me respekt e solemnitet. Po ai mbeti keq, pse, jo për faj të
tij, nuk mundi të jepte mendimin për një vendim kaq të rëndësishëm në historinë e
krishterimit, që do t’i bënte ballë shekujve. I pafat edhe historikisht ky papë,
pa faj edhe këtë herë: për disa shekuj me radhë u besua si i vërtetë një dokument,
i quajtur ‘donacioni kostandinian”, me të cilin perandori i dhuronte Silvestrit e
pasardhësve të tij, qytetin e Romës dhe disa provinca të tjera italiane. Ky dokument,
vërtetësia e të cilit dyshohej në shekullin X, në shekullin XVI do të konsiderohej
i rremë. Një vit pas vdekjes, Papës Silvestri iu kushtua festa e 31 dhjetorit,
ndërsa në Kishën lindore përkujtohet më 2 janar. Është Papa i parë që u lartua në
nderimet e elterit, pa qenë martirizuar. U varros në katakombet e Prishilës në rrugën
romake Salaria, por pjesa më e madhe relikeve të tij ruhen në Kishën romake kushtuar
Shenjtit. Gjatë papnisë së tij, Silvestri reformoi kalendarin dhe përdori për herë
të parë shprehjen e përgjithshme “ditët e javës”, në sa para tij i kushtoheshin perëndive
pagane. Prej këndej, në festën e tij, prindërit i kujtojnë bijave e bijve: “Shiko,
bija ime e edhe ti, biri im Po të dhurohen 365 ditë të reja. Kushtoja Zotit të
vërtetë e Ai do të t’i mbushë plot me gëzim!”.
Nuk dua të më tregosh, o
Zot, sesi do të jetë e nesërmja, e as në se ëndrrat do të mbeten ëndërr apo
do të bëhen jetë. Në se fara e hedhur nëpër hullitë e ditëve do të lulëzojë, apo
do të kalbet pa mbirë? E ditë e farë do të vdesin njëherësh me shpresën? Veç
ti e di në se do ta korr farën që hodha. Apo në të korra, korrësi nuk do
t’ia dijë se ç’bëri ai që mbolli? Po t’i mblatoj, o Zot, të gjitha thesaret, që
ndryhen në ditët e mia: gjumin e netëve e dritën e ditëve kur në sofër ulem
bashkë me të mitë, për të thyer bukën, për të pirë kupën, herë me verë e
herë me vrer! Vetëm një gjë të kërkoj. Veç për një gjë të lutem: Zoti im,
mos më lësho kur fryn e shfryn stuhia! Por edhe atëherë, kur dielli ndrin
mbi ditë e hëna përmbi net. Më ndihmo të bëhem ashtu si ty të pëlqen. Rrënjët
t’i lëshoj mbi Shkëmb!