“Drejt Krishtlindjes":Dielli dhe agimi në mitologjinë e lashtë të maleve
(20.12.2010 RV)Në liturgjinë e krishterë, Krishti është Dielli i jetës, simbol
që vjen nga thellësitë e lashtësisë. Ky simbol i mitologjisë së lashtë greke e romake,
ashtu si ai i agimit, përkon shumë me mitologjinë e maleve tona, në kohë të mugëta,
kur kalohej nga paganizmi në krishterim. Sipas mitologjisë së lashtë Dielli, Hëna
e Agimi ishin bijtë e hyjit Hiperion- zot i dritës, e të hyjneshës Theia, ‘e ndritshmja’,
e nderoheshin si zota. Me përhapjen e krishterimit në trojet e lashta iliro-shqiptare,
simbolet e kësaj mitologjie nisën të shndërrohen, duke fituar një kuptim të ri e një
vlerë të re. Populli i bjeshkëve vijoi për një kohë të gjatë të besonte se Dielli
e Hëna qenë vëlla e motër, në përkim të plotë me mitologjinë klasike. Ndërsa elementi
i krishterë i dha një kuptim të ri, shprehës simboleve të diellit e atij të agimit,
kur horizonti prapohet e pritet lindja e diellit të ri, në ditë të re. Drita i
tregon udhën njeriut, shtegtar i pacak, zë i humbur shkëmbijsh, gjithnjë plot me mall
e dëshirë për të parë larg. Për ta thyer errësirën. Për të afruar agimin, që e ndërron
gjakun në zemër. Sipas traditës së re të krishterë, besimtarët, kudo që ishin,
në shtëpi, në fushë a në mal, nisën të silleshin menjëherë me fytyrë nga dielli, duke
bërë shenjën e kryqit. Dielli i ri, në traditën e krishterë, nuk ishte më thjesht
një trup qiellor. Ishte Krishti. E agimi, Dita e ardhjes së parë të Zotit ndër ne,
Dita e Shën Këndellës.