Papa pret në Vatikan luteranët. Pas pesëqind vjetësh, katolikët dhe luteranët janë
afruar më tepër me njëri-tjetrin.
(16.12.2010 RV)Ekumenizmi i jep mundësi të reja katolikët dhe luteranëve për
të dëshmuar Ungjillin. Kështu iu drejtua, me pak fjalë, Papa Racinger kryetarit të
Federatës Luterane Botërore Imzot Munib Junan, pritur në audiencë bashkë me një delegacion
sot paradite në Vatikan. Në fjalimin e vet Benedikti XVI kujtoi edhe rëndësinë e “Deklaratës
së Përbashkët mbi Doktrinën e Justifikimit”, nënshkruar para 11 vjetësh, duke e quajtur
një hap të rëndësishëm drejt bashkimit të plotë të të krishterëve:
“Miq luteranë”,
i drejtua Papa të pranishëmve, e vetë këto fjalë i dhanë një kuptim të posaçëm fjalimit
të tij. Benedikti XVI kujtoi shpresat e shprehura në fillim të Papnisë së tij, kur
pati uruar që “lidhjet dhe dialogu intensiv” të vazhdojnë e t’i pasurojnë marrëdhëniet
ekumenike mes katolikëve dhe luteranëve. Sot vërejmë me shumë kënaqësi frytet shumë
domethënëse të diskutimeve dypalëshe që vazhdojnë prej disa dhjetëvjeçarësh, tha Papa:
“Me
ndihmën e Zotit – vazhdoi Benedikti XVI, qe e mundur, ngadalë dhe me durim, t’i kapërcejmë
pengesat dhe t’i përkrahim lidhjet e dukshme të bashkimit nëpërmjet dialogut teologjik
dhe bashkëpunimit praktik, veçanërisht në nivel bashkësish vendore”. Më tej Ati
i Shenjtë kujtoi edhe “Deklaratën e Përbashkët mbi Doktrinën e Justifikimit”, e cila
vitin e kaluar mbushi dhjetë vjet. Një dokument ky, pohoi Papa, që vlerësohet si një
hap domethënës gjatë shtegtimit të vështirë për ribashkimin e të krishterëve dhe një
shtytje e mëtejshme për diskutime të tjera ekumenike.
“Shpresoj – shtoi Papa
– që veprimtari të tilla ekumenike do t’iu japin mundësi të reja katolikët dhe luteranëve
të rriten së bashku në jetë, në dëshmimin e Ungjillit dhe në përpjekjen për ta çuar
dritën e Krishtit në të gjitha shtresat e shoqërisë.” Në veçanti, Benedikti XVI iu
drejtua Komisionit Ndërkombëtar Katoliko-luteran të Bashkimit i cili po punon mbi
një tekst të përbashkët me temën: “Pagëzim dhe bashkim kishtar në rritje.”
Në
përfundim, duke iu uruar të gjithë të pranishëmve Përshumë mot me paqë dhe gëzim Krishtlindjen,
Papa Racinger ia besoj bashkimin e të krishterëve Zotit, që është risi e vërtetë që
i tejkalon të gjitha parashikimet tona njerëzore.” përfundoi Ati i Shenjtë.