Մերձաւոր Արեւելքի աստուածաբանական ճեմարանի՝ (Նիր Իսթ Սքուլ աֆ Թէոլոճիի) քսան ուսանողներ,
զանազան երկիրներէ ժամանած՝ գլխաւորութեամբ իրենց պատասխանատուին՝ դոկտ. Ժորժ Սապրային,
այցելեցին չորեքշաբթի 8 դեկտեմբերին Մեծի Տանն Կիլիկիոյ կաթողիկոսութեան մայրավանքը
եւ լսեցին Նարեկ արք. Ալեէմեզեանի «Հայ եկեղեցին եւ Մեծի Տանն Կիլիկիոյ կաթողիկոսութիւնը
Միջին Արեւելքի քրիստոնէական վկայութեան շրջագիծին մէջ» դասախօսութիւնը: Նարեկ սրբազան
ներկայացուց հայ եկեղեցւոյ ծննդոցը, պատմութեան գլխաւոր հանգրուանները եւ հայ դաւանանքին
հիմնական երեսները։ Ապա, ան ծանրացաւ Մեծի Տանն Կիլիկիոյ կաթողիկոսութեան բազմերես առաքելութեան
վրայ: Հարց-պատասխանի ընթացքին, ուսանողներ առաւելաբար հետաքրքրուեցան հայ եկեղեցւոյ
ժողովրդավար կառոյցով, Հայ դատի գծով Մեծի Տանն Կիլիկիոյ կաթողիկոսութեան ունեցած դերակատարութեամբ,
հայութիւն-Թուրքիա յարաբերութիւններու հեռանկարով եւ հայ եկեղեցւոյ ազգապահպանման առաքելութեամբ։
Ուսանողները այցելեցին Մայր տաճար, Ապրիլեան նահատակաց մատուռ եւ «Կիլիկիա» թանգարան: