Pieter Feith: zgjedhje të mira, me gjithë parregullsitë
Shefi i Zyrës Civile Ndërkombëtare (ICO), Pieter Feith, përgëzoi popullin e Kosovës
për zhvillimin përgjithësisht të mirë të zgjedhjeve parlamentare të së dielës dhe
për atmosferën konstruktive që ka mbizotëruar në shumicën e vendvotimeve në Kosovë.
Ai tha se këto zgjedhje janë një hap i rëndësishëm drejt zhvillimit të mëtejmë demokratik,
dhe se do të kenë ndikim pozitiv për reputacionin ndërkombëtar të Kosovës dhe perspektivën
e saj evropiane. “Parregullsitë që janë vërejtur paraqesin një zhgënjim. Ato tregojnë
se demokracia është një proces mësimi. Tani është me rëndësi që ankesat që paraqiten
në periudhën e caktuar prej 24 orësh të hetohen menjëherë dhe plotësisht nga institucionet
përkatëse të Kosovës, e në veçanti nga Paneli i Zgjedhjeve për Ankesa dhe Parashtresa
(PZAP)”. “Rritja e pjesëmarrjes së përgjithshme në zgjedhje dhe pjesëmarrja e
mirë e komunitetit serb të Kosovës ka treguar një vendosmëri në rritje në mesin e
të gjitha komuniteteve për të marrë pjesë së bashku në ndërtimin e një të ardhmeje
të qëndrueshme, shumetnike për Kosovën. Është me rëndësi që e drejta për të votuar
është garantuar në tërë Kosovën përkundër veprimeve të koordinuara të frikësimit dhe
shqetësimit në komunat veriore. Autoritetet e Kosovës, e në veçanti Komisioni Qendror
i Zgjedhjeve, për të cilat këto ishin zgjedhjet e para të përgjithshme kanë kryer
punët e tyre përkatëse”. “Dua t’i shpreh falënderimet e mia për vëzhguesit diplomatik
nga shtetet anëtare të BE-së dhe vendet tjera që i janë bashkuar “Vëzhgimit të Zgjedhjeve
të Kosovës” që është koordinuar nga zyra ime, për të ndihmuar që zgjedhjet të jenë
në përputhje me standardet ndërkombëtare”, tha Feith. “Unë pres krijimin e një
qeverie të pastër, kompetente dhe kredibile, të gatshme për t’u ballafaquar me nevojën
urgjente për zhvillim socio-ekonomik dhe sundim të forcuar të ligjit. Nën dritën e
sfidave që janë përpara, konstituimi sa më parë i Kuvendit që çon në formimin e një
qeverie dhe zgjedhjen e Presidentit të ardhshëm, do të ishte në interesin e të gjithë
popullit të Kosovës.