(08.12.2010 RV)Në meditimin e nëntë të Kohës së Ardhjes, u njohëm me dy miq
qiellorë që, sipas gojëdhënës, në dy javët e para trokasin në shtëpitë tona e në
zemrat tona. Javën e tretë nga qielli zbret Engjëlli i bardhë. Rreh flatrat
e tejdukshme mes flokëve të dëborës, rreth globit, që vijon rrotullimin, e zbret mbi
shtëpitë tona, i veshur me një mantel të ndritshëm. Në dorë mban një rreze dielli.
Zbret për të takuar njerëzit, që e kanë zemrën plot me dashuri e i prek me rrezen
e dritës. Flakëza e rrezes u vezullon në sy e dhimbja shkrihet, si bora e re. Ndërmjet
sa e sa shtigjeve, që zhdridhen dheut në rrotullim, Engjëlli çel shtegun që çon në
majat më të larta, ku edhe njeriu bëhet krejt i bardhë! E ndjehet i lum sepse, në
mes të dimrit të acartë e të errët, zemra e tij ngrohet e ndritet me ngrohtësi e dritë
Parrizi, të cilin e provon mbi tokë vetëm kush i kushtohet plotësisht Foshnjës hyjnore,
që presim. Dielli xixëllon në sytë e tij, ia mbështjell duart, këmbët e gjithë trupin
me dritë. E është sidomos njeriu i varfër e i përvuajtur, ai që shndërrohet kështu
në dritë, duke u bërë i ngjashëm me engjëjt, sepse zemra e tij është plot me dashuri.
Engjëlli
ngjyrë vjollcë zbret nga qielli javën e katërt. Quhet kështu, sepse manteli i
tij është pikërisht me këtë ngjyrë. Fluturon mbi tokë, duke mbajtur në krahun e majtë
një harpë të artë. Luan gishtat mbi telat e saj e dheu mbushet plot me tinguj hyjnorë.
Zoti po vjen, është fare pranë... Ngjyra vjollcë përftohet nga bashkimi i blusë
me të kuqen, prej këndej, manteli vjollcë simbolizon dashurinë e vërtetë, të thellën,
e cila lind kur lutesh në heshtje e dëgjon një zë, që të pushton të tërin, përgjithëjetë.
Zërin e Zotit brenda nesh!