“Drejt Krishtlindjes: shtegtim atje, ku dashuria e Zotit iu dëftua mbarë botës”:
Historia e Engjëjve të Kohës së Ardhjes.
Historia e Engjëjve të Kohës së Ardhjes është pak e njohur në traditën shqiptare.
T’i takojmë, prandaj, duke ua hapur portat e shtëpive e të zemrave. Sipas gojëdhënës,
janë katër. Zbresin nga qielli, për të vizituar tokën, me veshje ngjyrash të ndryshme.
Secili ka një tipar të veçantë.
Engjëlli blu: është një engjëll i madh,
që zbret nga qielli për t’i ftuar njerëzit të përgatiten për Krishtlindje. Mbështillet
me një mantel blu, të endur me heshtje e paqe. Bluja e mantelit të tij përfaqëson
pikërisht heshtjen e lutjen e thellë.
Engjëlli i kuq quhet kështu, sepse
është i veshur me mantel të kuq. Zbret nga qielli, duke mbartur në dorën e majtë,
një shportë të zbrazur. Nuk është e thurur me thupra të zakonshme, si të gjitha shportat,
por me rreze dielli e mund të mbartë vetëm gjërat më të lehta e më delikate. Engjëlli
i kuq troket portë në portë, hyn shtëpi në shtëpi e kërkon. Kërkon, në zemrat e njerëzve,
pak dashuri. Kur e gjen, e merr dhe e vë në shportë. Rreh flatrat pastaj, me shportën
plot dashuri, drejt qiellit, ku banojnë të gjithë ata, që janë varrosur në tokë e
të gjithë engjëjt. Shpirtrat e ndritur e engjëjt e marrin dashurinë e bëjnë me të,
dritë për yjet. E kuqja e mantelit të Engjëllit të dashurisë e të dritës, është
pikërisht simbol i dashurisë.