Shpejt ipeshkvijtë irakianë do të flasin para Parlamentit Evropian për tragjedinë
e të krishterëve.
(07.12.2010 RV)“Do të shkojmë në Parlamentin Evropian ku do flasim për gjendjen
tonë dhe do të ngrejmë zërin në Evropë duke ia treguar hallin e frikën që kemi por
edhe se nuk kemi ndërmend ta braktisim vendin.” Kështu ia shpjegoi agjencisë Sir arsyet
e vizitës së një delegacioni ipeshkvijsh irakianë pranë Parlamentit Evropian në program
për 14 dhe 15 dhjetor, vikari patriarkal kalde i Bagdadit, Imzot Shlemon Varduni. Delegacioni
përbëhet nga kryeipeshkijvtë siro-katolikë të Bagdadit dhe të Mosulit Imzot Mati Shaba
Matoka, Imzot Xhorxh Kasmusa si edhe vetë Imzot Varduni. Nisma zhvillohet në kuadrin
e një varg iniciativash që kanë si qëllim sensibilizimin e opinionit publik dhe të
organeve ndërkombëtare për dhunën që ushtrohet kundër të krishterëve në Irak. Këtu
përfshihet edhe Dita e Agjërimit për martirët e katedrales siro-ortodokse të Bagdadit,
caktuar për më 9 dhjetor nga Këshilli i kryetarëve të fesë së krishterë në Irak. “Në
këtë këndvështrim merr kuptim edhe kërkesa jonë drejtuar besimtarëve që të mos festojnë
dhe mos të shpenzojnë për festat e kohës së Krishtlindjes” shtoi Imzot Varduni. Kjo
kërkesë është bërë nëpërmjet një mesazhi të ipeshkvijve të besojmave të ndryshme të
krishtera të pranishme në Irak të cilët i kërkojnë besimtarëve t’iu rrijnë pranë familjeve
të viktimave dhe të marrin pjesë në Meshën e Krishtlindjes me këtë ndjet në zemër.
Po ashtu iu bëhet thirrje të krishterëve të jenë të vëmendshëm kur vizitojnë një kishë
por pa pasur frikë nga thashethemet për atentate të mundshme. Në intervistën dhënë
agjencisë Sir, vikari kalde Varduni e përkufizon themelimin e një komisioni parlamentar
dhe të një task-force nga ana e qeverisë për mbrojtjen e pakicave të krishtera si
një hap përpara. “Nuk duam privilegje por vetëm respektimin e të drejtave tona.” nënvizoi
në fund imzot Varduni.