“Drejt Krishtlindjes: shtegtim atje, ku dashuria e Zotit iu dëftua mbarë botës”:
Nëntëditëshi dhe kurora e Kohës së Ardhjes.
Vijojmë meditimin me nëntëditshin dhe kurorën e Kohës së Ardhjes. Kjo periudhë
i ngjet shumë kremtimit të Lutjeve mbrëmësore. E realizohet pikërisht përmes përdorimit
të urtë të simboleve të kësaj Lutjeje: dritës, temjanit e kurorës së Festës. Është
e mira të shoqërohet me shpalljen e Fjalës së Zotit dhe me një reflektim të shkurtër.
Kënga e bashkësisë duhet të përgatitet e të udhëhiqet. Nëntëditshi i Krishtlindjes
është një ‘Antologji e vërtetë biblike”, që e pasuron dhe e larton shpirtin. Nuk
anon nga përshpirtëria devocionale, por frymëzohet thellësisht nga Lajmi i mirë,
duke e përfshirë gjithë bashkësisë në Fjalën e Zotit, të kënduar. Nuk është, pra,
koncert, me këngëtarë të përgatitur posaçërisht për nëntëditëshin. Për të kujtuar
afrimin e ditës, në të cilën kremtohet Lindja e Krishtit, 25 dhjetorin, bashkësitë
e krishtera të Evropës Veriore përdorin edhe kurorën e Kohës së Ardhjes. Në vendet
e gjuhës gjermane, simbol i kësaj Kohe është një kurorë me emrin “Adventskranz”. Kurora,
që tashmë stolis mjediset e Solemnitetit në mbarë botën e krishterë, thuret me degë
pishe e zbukurohet me stoli të vogla, të ndritshme, të arta e të kuqe. Mbi to, katër
qirinj. Janë simbol i të dielave, që do të kremtohen deri në ditën e Ardhjes së Zotit.
Tre janë me ngjyrë vjollcë. I katërti, me ngjyrën gazmore të festës, rozë. Sipas traditës,
në mbrëmjen e katër të dielave, që i paraprijnë Krishtlindjes, ndizet një nga qirinjtë:
tri drita vjollcë e një rozë: simbol i pendesës dhe i agjërimit, por sidomos, i fitores
së shpresës, i dritës qiellore, kur ngjyra e verdhë e fletëve, që këputen nga dega,
e shkurton dritën tokësore. Ana e keqe e jetës mbytet në dyllin e shkrirë të qirinjve
e Fjala jehon shungullueshëm ndër ne.