Sot 5 dhjetor,Kisha kremton te dielen e II te Ardhjes, Ungjilli na paraqet
figurën e shën Gjon Pagëzuesit, i cili na shoqëron gjatë gjithë Kohës së Ardhjes.
Mesazhi i tij na shtyn drejt veprave të bamirësisë, na shtyn të mos kënaqemi me sa
shohim në sipërfaqen e gjërave, por të shkojmë më thellë, pasi Zoti lexon në zemrat
tona. Nesër, 6 dhjetor, Kisha Katolike kremton festën e shën Nikollës,
Shën Azelës e të shën Obicios. Liturgjia e ditës na fton ta pranojmë Zotin, që vjen
të na çlirojë nga mëkati, i cili na e ndrydh shpirtin. Hyji ynë vjen të na shpëtojë!
Edhe ne, bij të këtij shekulli, që ka harruar mrekullitë e Perëndisë, nëse e hapim
zemrën, mund të shohim gjëra të jashtëzakonshme.
Të martën, më 7 dhjetor,
kujtohet shën Ambrozi, ipeshkëv e doktor i Kishës. Liturgjia na thotë se Zoti
vjen me gjithë fuqinë e vet e nuk gjen paqe derisa, me dashurinë e vet, të mos e kthejë
në rrugë të drejtë atë që gabon. Ky është gëzimi i Tij më i madh. Kështu duhet të
jenë të gjithë barinjtë e Kishës. Shën Ambrozi është shembull për këtë, pasi diti
t’i fitojë zemrën shën Augustinit. Po këtë ditë kujtohet edhe shën Maria Roselo.
E
mërkura është ditë e madhe për Kishën Katolike, më 8 dhjetor kremtohet
festa e Zojës së Papërlyer. Këndojini Zotit një këngë të re, thotë psalmi i kësaj
dite, sepse ka bërë mrekulli. Zoti është i mëshirshëm e i madh në dashuri. Të
enjten, më 9 dhjetor, bie festa e shën Sirit dhe e shën Gorgonës. Liturgjia na
kujton sërish shën Gjon Pagëzuesin, figura e të cilit është kulmi i krejt historisë
së shëlbimit, që ka ndodhur para tij. Ai e ndan kohën më dysh: nga ai moment, fillon
koha mesianike.
Të premten, më 10 dhjetor, Kisha Katolike feston Zojën
e Loretos, por edhe shën Eulalien e shën Gregorin III. Kush të ndjek o Zot, do të
ketë dritën e jetës, thotë psalmi. Pandjeshmëria dhe indiferenca: ja rreziku më i
madh, që mund ta kërcënojë këtë kohë pritjeje. T’ia hapim zemrën pra, fjalës së shën
Gjon Pagëzuesit, i cili paralajmëron ardhjen e Hyjit.
Bëj të shkëlqejë Fytyra
jote o Zot, e ne do të shpëtojmë. Të shtunën, më 11 dhjetor, kremtohet festa
e shën Damazit I papë, shën Daniel Stilitës dhe e shën Sabinit. Ungjilli na vë përpara
vuajtjen e Krishtit, kur refuzohet nga ata që nuk e duan e nuk e presin.
Më
12 dhjetor bie e diela III e Ardhjes. Ndizet qiriri i tretë në pritjen e Lindjes
së Krishtit. Njëkohësisht kremtohet Zoja e Guadalupes. Kisha na fton të bëjmë gjeste
solidariteti, sado të vogla.