«Цэрквы Рыма і Канстанцінопаля
маюць абавязак новага заключэння сувязяў камуніі, каб паказаць, што яны годныя спадчыны,
якую пакінулі апосталы Пётр і Андрэй», — адзначыў падчас сустрэчы з прадстаўнікамі
Ватыкана Патрыярх Барталамей І. Кіраўнік Канстанцінопальскай Праваслаўнай Царквы прыняў
30 лістапада 2010 г. дэлегацыю Апостальскай Сталіцы, якая прымала ўдзел ва ўрачыстасці
св. апостала Андрэя.
Патрыярх Барталамей нагадаў аб 50-гадовай дзейнасці Папскай
рады спрыяння хрысціянскаму адзінству, якой з ліпеня гг. кіруе кардынал Курт Кох.
Іерарх падкрэсліў таксама значэнне тэалагічнага дыялога паміж дзвюма Цэрквамі, бо
«еднасць у любові патрабуе адначасова еднасці ў веры і праўдзе». Патрыярх запэўніў,
што ўсе аўтакефальныя Праваслаўныя Цэрквы згодныя з тым, што для падтрымкі гэтага
дыялога важна «ў духу любові пераасэнсаваць тэалагічныя пытанні, як тыя, што злучаюць
нас, так і тыя, якія падзяляюць, каб усе мы прыйшлі да еднасці ў веры».
Узгадваючы
аб пасяджэнні Міжнароднай змешанай камісіі па тэалагічным дыялогу паміж Каталіцкім
Касцёлам і Праваслаўнай Царквой, якое праходзіла ў Вене (Аўстрыя) 20–27 верасня гг.,
Патрыярх Барталамей адзначыў, што яно ўказала на існуючыя цяжкасці і разам з тым на
гатоўнасць усіх членаў камісіі пераадолець іх з любоўю і ў вернасці дактрыне і жыццю
Касцёла. На прыкладзе свв. апосталаў праваслаўны іерарх заахвоціў Цэрквы Рыма і Канстанцінопаля
шукаць «сувязі камуніі».
«Таксама і сёння, перад абліччам вялікіх перашкодаў,
свет шукае адкуплення і збаўлення. Тыя, хто абвяшчае Хрыста і падзелены паміж сабой,
не могуць пераканаць свет… Верныя праўдзіваму пасланню Апосталаў, мы пакліканы, каб
перадаць гэтае пасланне, прамаўляючы да сучаснага свету адзінымі вуснамі і адзіным
сэрцам», — падкрэсліў Патрыярх.