Кардынал Курт Кох,
Старшыня Папскай рады па садзейнічанні хрысціянскаму адзінству ўпершыню ўзначальвае
дэлегацыю Святога Пасаду на ўрачыстасці святога апостала Андрэя, апекуна Канстанцінопальскага
Патрыярхату, у Стамбуле. Сёння ватыканская дэлегацыя прыняла ўдзел ва ўрачыстай літургіі,
якую ўзначаліў патрыярх Барталамей I у горадзе Фанар і сустрэлася з самім кіраўніком
Канстанцінопальскага Патрыярхату і сінадальнай камісіяй, якая адказвае за адносіны
з Каталіцкім Касцёлам. Кардынал Кох прачытаў урачыстае пасланне Святога Айца да Патрыярха
і сабраных на ўрачыстасці.
Папа падзякаваў Богу за цуды, якія Ён зрабіў у сваёй
бясконцай міласэрнасці праз жыццё і пакутніцкую смерць святога Андрэя.
У наш
час, - напісаў у сваім лісце Бэнэдыкт XVI - заклік быць вернымі пасланню Хрыста як
ніколі востра стаіць перад усімі хрысціянамі. У свеце, які характарызуецца ростам
ўзаемазалежнасці і салідарнасці, мы пакліканы абвяшчаць з новай сілай праўду Евангелля
і прапаведаваць Уваскрослага Пана, каб адказаць сёння на самыя глыбокія пытанні і
духоўныя памкненні мужчын і жанчын.
На думку Папы, каб асягнуць поспех у гэтай
вялікай задачы, мы павінны працягваць дамагацца прагрэсу на шляху да поўнага адзінства,
паказваючы, што мы ўжо адзіныя ў нашым сведчанні аб Евангеллі перад сучаснымі людзьмі.
Святы
Айцец падзякаваў Барталамею І за яго мудрую працу на карысць Праваслаўя і распаўсюджвання
хрысціянскіх каштоўнасцяў у шматлікіх міжнародных кантэкстах.