Uikiliks nxjerr fakte edhe për Shqipërinë dhe qeverisjen e saj.
(30.11.2010 RV)Shtypi shqiptar njoftoi sot se në materialet sekrete të bëra
publike nga siti web Uikiliks ka edhe dokumente që i përkasin Shqipërisë dhe qeverisë
Berisha. Kryesisht bëhet fjalë për dokumente të ambasadës amerikane në Tiranë por
edhe të selive të tjera amerikane si ajo në Paris apo Athinë. Temat që rrahen më shumë
në këto dokumente, klasifikuar si sekrete, janë anëtarësimi i vendit në Nato, lufta
kundër korrupsionit, pakti detar Tiranë – Athinë, shpërthimi i Gërdecit etj. Por ndër
tjera, tërheq veçanërisht vëmendjen fakti se “Bankers Petroleum”, një shoqëri naftënxjerrëse
kanadeze, zhvillon një veprimtari të dendur në Shqipëri ku shfrytëzon disa puse në
zonën e Visokës, Patos. Gjithnjë sipas këtij dokumenti kjo shoqëri është fajtore për
ndotjen e jashtëzakonshme të mjedisit në këtë zonë të Shqipërisë. Raporti vazhdon
duke nënvizuar se përqindja e kancerit këtu është rritur e po ashtu edhe niveli i
amoniakut dhe i lëndëve të tjera helmuese është tepër i lartë. Po ashtu, në dokumente
të tjera kritikohet qeverisja tepër e ashpër e kryeministrit Berisha dhe ngathtesia
në luftimin e korrupsionit. Një pjesë e dokumenteve në fjalë u botuan sot nga të përditshmet
shqiptare.