Sekretari i shtetit të Vatikanit u dorëzon ortodoksëve të Kazakistanit një relike
të shën Andreut Apostull
(30.11.2010 RV)Sot paradite , në katedralen ortodokse të Astanës në Kazakistan,
sekretari i shtetit të Vatikanit, kardinali Tarçizio Bertone i dorëzoi bashkësisë
ortodokse të vendit një fragment nga reliket e shën Andreut Apostull, pikërisht në
ditën e festës së shenjtit. Ky fragment, tha kardinali, iu shtyftë të shumëfishoni
përpjekjet, që në të ardhmen jo të largët, dishepujt e Krishtit të shpallin me një
zë e me një zemër Ungjillin, mesazh shprese për krejt njerëzimin. Autoritetet e
Kazakistanit e ftuan kardinalin Tarçizio Bertone për vizitë, në prag të mbledhjes
së Organizatës për Sigurimin dhe Bashkëpunimin në Evropë (OSBE), që do të mbahet më
2 e 3 dhjetor në Astana. Selia e Shenjtë, e cila është anëtare e OSBE-së, do të marrë
pjesë në konferencë. Para kremtimit liturgjik, kardinal Bertone u takua me presidentin
e Kazakistanit, Nursultan Nazàrbajev dhe me Ministrin e Jashtëm. Të premten, Sekretari
i shtetit të Vatikanit do t’i dorëzojë edhe Kishës Katolike një fragment të relikeve
të shën Andreut Apostull, gjatë kremtimit eukaristik në katedralen e Astanës.