Papa mbështet fushatën evropiane kundër shpërdorimeve me fëmijët
(30.11.2010 RV)Papa Benedikti XVI shprehu mbështetjen e tij të fuqishme për
fushatën e re, që filloi dje Këshilli i Evropës, me objektiv luftën kundër dhunës
mbi të miturit dhe përmirësimin e bashkëpunimit ndërkombëtar për t’ia dorëzuar fajtorët
drejtësisë. Kardinali Renato Rafaele Martino, ish-Vëzhgues i Selisë së Shenjtë
në Kombet e Bashkuara, mori pjesë në promovimin e nismës dhe theksoi se Papa inkurajon
gjithë veprimtarinë kundër dhunës seksuale ndaj të miturve. Prelati, duke pranuar
fajet e anëtarëve të Kishës Katolike në këtë fushë, kritikoi sulmet e vazhdueshme
– siç tha ai – pikërisht kundër institucioneve, që kanë zgjedhur rrugën e transparencës.
Benedikti XVI, shpjegoi kardinal Martino, e ka përballuar realitetin e krimeve seksuale
mbi të miturit me vuajtje, por edhe me qartësi, me vendosmëri e me dorë të fortë.
Kisha, vazhdoi kardinali, uron që programi evropian të sjellë sa më shumë fryte e
shpreson në bashkëpunimin sa më të gjerë ndërmjet të gjitha forcave në lojë. Zv.sekretari
i përgjithshëm i Këshillit të Evropës, Maud de Boer Bukuikio kujtoi se në Evropë,
një ndër pesë fëmijë është viktimë e abuzimeve seksuale. Programi parashikon një seri
reklamash, librash e materialesh për fëmijët në moshën 4-7 vjeç, me qëllim shpjegimin
e kufirit ndërmjet shprehjeve të dashurisë dhe abuzimit, si edhe inkurajimin për të
thënë “jo”. Përsa u përket institucioneve fetare, funksionari i Këshillit të Evropës
theksoi se është e nevojshme, që sa më shpejt të vendosen në to personat e duhur,
para se të jetë tepër vonë.