Mesazh i Papës për Bartolomeun I në festën e shën Andreut: të krishterët duhet ta
dëshmojnë Krishtin sëbashku
(30.11.2010 RV)Të ecim në rrugën
drejt bashkimit të plotë: ky është mesazhi i Papës për Patrikun Bartolomeu I, me rastin
e festës së sotme të Shën Andreut, pajtor i Patriarkanës Ekumenike të Kostandinopojës.
Dokumenti u dorëzua nga kreu i dikasterit vatikanas për bashkimin e të krishterëve,
kardinali Kurt Koh, i cili ndodhet në Stamboll sëbashku me një delegacion të Selisë
së Shenjtë, për festën e shën Andreut. Ky kremtim, shkruan Benedikti XVI, është
ftesë për të rinovuar besnikërinë tonë ndaj mësimeve të Apostujve, duke e shpallur
pa u lodhur fenë në Krishtin, me fjalë e me dëshminë e jetës. Në kohën tonë, kjo ftesë
është urgjente dhe përfshin gjithë të krishterët. Zoti i Ringjallur, vazhdon Papa,
është përgjigjia jonë për aspiratat më të thella shpirtërore të njerëzve të sotëm.
Për realizimin e kësaj detyre, duhet të ecim drejt bashkimit të plotë e duhet të tregojmë
se i kemi bashkuar tashmë forcat për dëshminë e përbashkët të Ungjillit para bashkëkohësve.
Në fund, Papa i shpreh mirënjohjen Bartolomeut I për mikpritjen, që u ofroi delegatëve
të Konferencave Ipeshkvnore të Evropës, të cilët u mblodhën në tetor në Rodi sëbashku
me përfaqësuesit e Kishave ortodokse evropiane për Forumin II katoliko-ortodoks me
temë: “Marrëdhëniet Kishë-Shtet: perspektiva teologjike e historike”. Siç e thamë,
kardinali Kurt Koh me një delegacion nga Vatikani ndodhet në Stamboll për Festën e
Patriarkatit Ekumenik. Vizita bëhet në kuadrin e shkëmbimeve për festat e pajtorëve
të të dy selive: më 29 qershor në Romë për kremtimin e shën Pjetrit e shën Palit dhe
më 30 nëntor në Stamboll për kremtimin e shën Andreut. Sot paradite, Liturgjia Hyjnore
në Stamboll ne kishën e Fanarit u kryesua pikërisht nga Bartolomeu I. Gjithashtu delegacioni
vatikanas u takua me Patrikun dhe me Komisionin sinodal, të ngarkuar për marrëdhëniet
me Kishën Katolike. Por le të flasim për shën Andreun, përmes reflektimeve të Papës
në audiencën e 14 qershorit 2006. “Kemi gjetur Mesinë”: ky është lajmi i jashtëzakonshëm,
që Andreu i jep të vëllait më të madh, Pjetrit. Prandaj, kujton Benedikti XVI, shën
Andreu, në Kishën bizantine, quhet “protoklit”, apo “i thirrur i pari”. Papa nënvizon
se njësoj si Pjetri e Andreu, edhe Roma e Kostandinopoja kanë ndërmjet tyre marrëdhënie
të veçanta, janë Kisha motra. Njeri, që i merr në sy rreziqet, vazhdon akoma Papa,
shën Andreu është dëshmitar i guximshëm i fesë, u çon të tjerëve me entuziazëm Lajmin
e Mirë. Një shembull, që duhet ta ndjekim edhe sot: “Shën Andreu Apostull na
mësoftë ta ndjekim Krishtin me gatishmëri, të flasim me entuziazëm për Të atyre që
takojmë, e sidomos, të mbajmë marrëdhënie të vërteta familjare me Të, të vetëdijshëm
se vetëm tek Krishti mund të gjejmë kuptimin e fundmë të jetës e të vdekjes”. Andreu,
vazhdon reflektimin Papa, është edhe apostulli, që nuk ka frikë t’i bëjë pyetje Jezusit.
E pyet për shembull si mund ta shuajnë urinë e një morie njerëzish pesë bukë e dy
peshq, ose kur do të shkatërrohet Tempulli i Jeruzalemit. Edhe në këtë rast, shën
Andreu na tregon një mënyrë personale për t’i përjetuar marrëdhëniet me Krishtin: “Nga
kjo mund të themi, si pasojë, se nuk duhet të kemi frikë t’i bëjmë pyetje Jezusit,
por njëkohësisht, duhet të jemi të gatshëm t’ia pranojmë mësimet, që na ofron, edhe
kur janë të papritura e të vështira”. Pjetri në Romë, Andreu në Greqi. Dy vëllezërit,
thotë Papa, bashkohen nga dëshmia ungjillore dhe martirizimi. Të dy, të thirrur të
jenë peshkatarë njerëzish, do të vdesin në Kryq, njëlloj si Krishti. Shën Andreu na
tregon se Kryqi është i lum, sepse është rruga e shëlbimit tonë: “Ne duhet të
mësojmë nga kjo diçka shumë të rëndësishme: kryqet tona marrin vlerë, vetëm nëse konsiderohen
dhe pranohen si pjesë e Kryqit të Krishtit, vetëm nëse ndriçohen nga rrezet e dritës
së Tij. Vetëm nga ai Kryq, vuajtjet tona fisnikërohen dhe marrin kuptimin e tyre të
vërtetë”.