Koha kishtare të Ardhjesë dëshmon se Zoti e ka përqafuar natyrën tonë njerëzore
Me këtë diele të parë të kohës kishtare të Ardhjes, ne fillojmë përgatitjen tonë shpirtërore
për kremtimin e Krishtlindjes, dillojmë parapërgatitjen shpirtërore për ta pritur
Zotin që i përshkon udhët tona njerëzore dhe vjen vazhdimisht e pambarimisht në historinë
tonë duke kërkuar një zemër të gatshme për të banuar e për t’u mishëruar. Krishtlindja
dmth. pikërisht Mishërim i Zotit Jezu Krisht në natyrën tonë njerëzore e në jetën
tonë personale. Krishtlindja, është dëshmimi i faktit se Zoti e ka përqafuar natyrën
tonë njerëzore, se Zoti me dashuri i ka marrë mbi vete të gjitha të metat tona njerëzore,
të gjitha kufizimet, vështirësitë, gabimet tona, të këqijat pikërisht për të na liruar
nga ky robërim vdekjeprurës shpirtëror e njerëzor. Këtë Ai e ka realizuar përmes Dashurisë
së Tij të pakufishme Hyjnore, të cilën e mishëroi dhe e dëshmoi në Jezu Krishtin nga
Shpella e Betlehemit e deri me vdekjen mbi Kryq dhe Ngjalljen e Tij, dmth. me ngadhënjimin
e Tij përfundimtar mbi të këqijat, mbi vdekjen dhe djallin e mallkuar. Sivjet
ky fillim i Vitit të Ri kishtar përkon fatbardhësisht edhe një festë tjetër, të natyrës
kombëtare që na përkujton shënimin e arritjet së çlirimit të kombit shqiptar nga
robërimi i gjatë dhe i errët i zgjedhës së rëndë të perandorisë otomane turke. Pra,
të gjithë dëgjuesve shqiptarë të Radio Vatikanit e të gjithë shqiptarëve pa dallim
e kudo që ndodhën, urimet më të përzemërta për festën e madhe të Flamurit të kombit
shqiptar nga ekipi i Programit Shqip i Radio Vatikanit. Duke përkujtuar dhe
kremtuar Ditën e 28 Nëntorit, shqiptarët shprehin mirënjohjen ndaj të gjithë atyre
burrave, trimave, intelektualëve, diplomatëve, klerikëve e të sa e sa shqiptarëve
që në mënyrë të heshtur ia kanë përkushtuar jetën dhe gjithçka kanë pasur vlerës së
Dritës së Lirisë së Kombit e të Vendit. E iu kthyer Vitit të Ri liturgjik që fillojmë
sot, po kujtojmë se gjatë katër të dielave të kohës së Ardhjes, që paraprijnë e përgatisin
festën e Krishtlindjes, kemi disa personazhe apo figura madhore biblike që na ndihmojnë
dhe na prijnë në udhën tonë shpirtërore drejt Shpellës së Betlehemit: e këto janë
Zoja e Bekuar Virgjëra Mari, Izaia profet dhe Gjon Pagëzuesi. Liturgjia e kësaj
së diele të parë të Ardhjes na thërret ta presim Krishtin të zgjuar, të gatshëm e
të aftë për ti njohur e kuptuar shenjat e pranisë së tij hyjnore mes nesh. Duhet të
jemi të përgatitur, të gatshëm sepse Zoti vjen atëherë kur nuk e mendojmë dhe nuk
e presim, pra, vjen papritmas, kështu është mirë për ne, që kur të vijë në jetën tonë,
të na gjejë zgjuar e të përgatitur për ta pranuar në zemrat tona. Koha e Ardhjes është
përgatitje për Krishtlindje por është edhe kohë e volitshme për t’iu përkushtuar më
shumë dëgjimit të Fjalës së Zotit dhe bashkimit tonë përreth saj, sepse është dritë
për hapat tanë në udhën e jetës së përditshme.