Grossbruck, BE ta rivlerësojë saktë raportin për Shqipërinë
Zv/Presidenti i Asamblesë Parlamentare të OSBE-së, njëkohësisht deputet në Parlamentin
e Austrisë, Wolfgang Grossruck, gjatë një fjale të mbajtur në seancën plenare të parlamentit
austriak i kërkoi Bashkimit Evropian që "raporti aktual për Shqipërinë të vlerësohet
mirë dhe saktë". Sipas zyrës së shtypit të Kuvendit, duke marrë fjalën në parlamentin
austriak, gjatë shqyrtimit të një marrëveshje me palën shqiptare në fushën e sigurisë,
deputeti Grossruck bëri një prezantim të Shqipërisë, duke e cilësuar atë vendin që
e ka vuajtur më shumë se të tjerët regjimin komunist dhe që e ka pasur më të vështirë
se vendet e tjera të Ballkanit rrugën drejt zhvillimit. "Por, të gjithë ata që
e kanë vizituar Shqipërinë, konstatojnë se sa shpejt dhe pozitivisht është zhvilluar
ky vend dhe sa i dukshëm paraqitet përparimi dhe progresi i tij nga pikëpamja ekonomike,
e turizmit dhe e infrastrukturës", tha ai. Duke i rekomanduar gjithkujt që ta
vizitojë Shqipërinë, Grossruck theksoi se "të pushton trishtimi kur sheh mënyrën se
si disa njerëz ende sillen me këtë vend, sikur të ishte i rangut të fundit dhe ku
gjallon, sipas tyre, korrupsioni, trafiku i njerëzve dhe krimi". "Kundër këtij
imazhi kam bindjen e palëkundur, se ne të gjithë duhet të luftojmë dhe të ndërmarrim
gjithshka. Është kjo një arsye më shumë për të mos arritur dot të kuptoj, se Raporti
aktual i Komisionit të Bashkimit Evropian e klasifikon diku Shqipërinë, pikërisht
atje ku asaj nuk i takon të jetë, si dhe nëpërmjet rezonancës së këtij veprimi shtyhen
në kohë negociatat e anëtarësimit me BE-në", tha Grossruck. "Nga foltorja e Parlamentit
Austriak unë kërkoj në mënyrë të prerë, që zotërinjtë, që ndoshta nuk kanë shkelur
ende në Shqipëri, duhet ta vizitojnë këtë vend dhe të krijojnë një tablo të qartë
atje, pasi vetëm atëherë ata do të arrijnë të rivlerësojnë edhe njëherë ekspertizën
e tyre", u shpreh parlamentari austriak. Në fjalën e tij ai gjithashtu e vlerësoi
si të gëzueshme marrjen fund të regjimit të vizave për shqiptarët, duke e cilësuar
këtë "shume domethënëse dhe të nevojshme". (nga ATSH-ja)