Më datën 21 nëntor përkujtohej imzot Pjetër Budi në 444- vjetorin e lindjes.
Imzot Pjetër Budi, i lindur në Gurin e Bardhë të Matit në vitin 1566, qëndroi në vendlindje
deri në moshën 21 vjeçare. Më pas u shugurua meshtar dhe kreu për 29 vjet misionin
baritor meshtarak në Kosovë e në Maqedoni. Duke ndjerë nevojën e librave liturgjikë
në gjuhën shqipe, u nis për në Romë, ku me kujdes prej bariu e këmbëngulje prej studiuesi,
arriti të botonte katër libra, të domosdoshëm për vijimin e punës ungjillëzuese e
baritore në një vend që vijonte të kërcënohej nga islamizimi që sollën Turqit. Veprat
e ipeshkvit shqiptar imzot Pjetër Budit janë gur themel për historinë e shqipes së
shkuar: “Doktrina e Kërshtenë”; “Pasqyra e të rrëfyemit” dhe “Rituali Romak”. Pas
botimit të librave, prifti u rikthye menjëherë në atdhe, ku u emërua ipeshkëv i Zadrimës.
Me librat e sapo botuar në dorë, nisi kremtimet e Sakramenteve të Shenjta në gjuhën
shqipe. Më 1622 u mbyt në lumin Drin, vdekje që pa dyshim lidhet ngushtë me veprimtarinë
e tij të gjithanshme fetare e atdhetare. Imzot Budi mbetet poeti i parë i letrave
shqipe.