Сёння ў Мінску адбыліся
ўрачыстасці святкавання 100-гадовага юбілею касцёла св. Сымога і св. Алены. Святая
Імша, якая распачалася ў 12.00 гадзін, стала кульмінацыйным момантам святкавання.
Яе ўзначаліў Апостальскі нунцый у Беларусі арцыбіскуп Марцін Відавіч. Гамілію прамовіў
Мітрапаліт Тадэвуш Кандрусевіч. На літургіі прысутнічалі каталіцкія іерархі з Беларусі
і з-за мяжы, прадстаўнікі Праваслаўнай Царквы, дыпламаты. Некаторыя вернікі ў гэты
памятны дзень атрымалі сакрамэнт канфірмацыі.
Урачыстасці папярэднічала малітоўная
падрыхтоўка. Так, 11 лістапада стартавала 9-дзённая навэнна. Непасрэдна перад святкаваннем
юбілею адбыўся малітоўны трыдуум, які распачаўся 19 лістапада першай міжрэлігійнай
малітвай. У малітоўнай сустрэчы прынялі ўдзел прадстаўнікі розных канфесій і рэлігій,
прысутных у Беларусі.
Пасля сённяшніх святкаванняў распачнецца актава парафіяльнага
свята. На працягу тыдня акрамя цэлебрацыі набажэнстваў будуць чытацца літаніі да розных
святых і апекуноў.
100-годдзю святыні, як адзначыў пробашч кс. Уладзіслаў Завальнюк,
будуць прысвечаны ўсе важныя мерапрыемствы, што адбудуцца на працягу юбілейнага года.
Першае з іх запланавана на 23 лістапада. На навуковую сустрэчу, прысвечаную нацыянальнай
ідэі ў штодзённым жыцці хрысціяніна, збяруцца прадстаўнікі дыпламатычнага корпусу.
Нацыянальная ідэя, па словах кс. Уладзіслава Завальнюка, павінна засноўвацца на Хрысце,
Яго вучэнні, на Святым Пісанні і веры.