Benedikti XVI në Meshën me kardinajtë e rinj: t’i shërbeni fesë e t’i bindeni Kryqit
(21.11.2010 RV)Shërbimi i parë, që duhet të bëjë një Papë është ai i fesë dhe
i bindjes para Kryqit të Krishtit. E ky është edhe shërbimi kryesor i kardinajve.
Kështu foli Benedikti XVI gjatë Meshës së sotme në Bazilikën e Vatikanit, me 24 kardinajtë
e rinj, që krijoi dje gjatë Konçistorit publik. Në lutjen e Engjëllit të Tënzot, pas
kremtimit eukaristik, Papa bëri thirrje për të krishterët e persekutuar në Irak e
për të dëmtuarit nga përmbytjet në Kolumbi. Siguroi gjithashtu lutjen e vet për viktimat
e aksidenteve rrugore e për bashkësitë e klauzurës, në ditën, që Kisha ia kushton
atyre.
Prelatë, ipeshkvij,
autoritete, ambasadorë e besimtarë nga e gjithë bota ishin mbledhur sot paradite në
Bazilikën e Shën Pjetrit, sëbashku me Papën, për një “ngjarje të gëzuar”: Mesha me
kardinajtë e rinj e dorëzimi i unazës kardinalore, ku shihet qartë kryqëzimi i Krishtit,
vulë e paktit martesor me Kishën, siç shpjegoi Benedikti XVI. Në solemnitetin
e sotëm të Krishtit Mbret, me të cilin përfundon viti liturgjik, Benedikti XVI kërkoi
të meditohet thellë mbi shërbimin e Ipeshkvit të Romës e të kardinajve, në dritën
e pushtetit mbretëror të Jezusit. “Shërbimi i parë i Pasardhësit të Shën Pjetrit
është ai i fesë” Shën Pjetri, shpjegoi Papa, bëhet “gur” që mban Kishën, pasi
beson në Krishtin, me një fe fillimisht jo shumë të fortë e tepër njerëzore, por pas
Pashkëve, kjo fe bëhet e aftë ta ndjekë Krishtin deri në dhurimin e vetvetes. Shën
Pjetri besoi se Krishti ishte mbreti i vërtetë, pikërisht sepse Jezusi nuk iu shmang
Kryqit, duke dhënë jetën për mëkatarët e kësaj bote: “Drama që luhet nën kryqin
e Jezusit është universale; ka të bëjë me të gjithë njerëzit para Hyjit, që na zbulohet
ashtu siç është, Dashuri”. Pasardhësi i Shën Pjetrit dhe kardinajt janë pra,
të thirrur të qëndrojnë pranë Krishtit, ashtu si Maria, e jo t’i kërkojnë të zbresë
prej kryqit: “ Për shkak të shërbimit tonë, këtë duhet ta bëjmë jo vetëm për
vete, por për krejt Kishën, për krejt popullin e Zotit”. Vërtet, kryqi qe
pika e dobët e Simon Pjetrit dhe e apostujve të tjerë, të cilët si njerëz, nuk mund
ta duronin idenë e Mesisë së kryqëzuar. Ja sepse, kthimi i shën Pjetrit realizohet
plotësisht kur ai heq dorë nga dëshira për ta shpëtuar Jezusin e pranon të shpëtohet
prej Tij, theksoi Ati i Shenjtë: “Edhe shërbimi im, të dashur vëllezër, e si
pasojë edhe juaji, ka të bëjë i gjithi me fenë. Jezusi mund ta ndërtojë mbi ne Kishën
e vet, nëse gjen tek ne atë fe të vërtetë të Pashkëve, atë fe, që nuk dëshiron ta
zbresë nga Kryqi, por i besohet plotësisht Atij mbi Kryq”. Vendi më autentik
për Vikarin e Krishtit është Kryqi, vazhdoi Papa, është t’i bindesh gjithmonë Atij: “Është
i vështirë ky shërbim, sepse nuk përkon me mënyrën e të menduarit të njerëzve, me
atë logjikë të natyrshme, që është gjithnjë aktive edhe brenda nesh. Por ky është
dhe mbetet gjithnjë shërbimi ynë i parë, shërbimi i fesë, që shndërron krejt jetën”. E
duke iu referuar festës së sotme të Krishtit Mbret, Papa shpjegoi se pse kardinajtë
duhet të besojnë se Jezusi është Zot, se është Mbret, pasi arriti deri në pikën e
dhurimit të vetvetes për dashurinë e jashtëzakonshme për njerëzit: “Papa dhe
kardinajtë janë të thirrur të jenë të bashkuar thellësisht, së pari në këtë: të gjithë
sëbashku, nën udhëheqjen e Pasardhësit të Shën Pjetrit, duhet të mbeten nën zotërimin
e Krishtit, duke menduar e vepruar sipas logjikës së Kryqit – e kjo nuk është kurrë
as e lehtë, as e thjeshtë”. Por është pikërisht brenda këtij plani, që historia
lartohet në nivelin e Hyjit e njëkohësisht, gjen vend në Kishë, kreu i së cilës është
Krishti: “…ja cili është gëzimi ynë: të marrim pjesë në Kishë, në plotësinë
e Krishtit, përmes bindjes para Kryqit, të marrim pjesë në fatin e shenjtorëve të
dritës, të ‘transferohemi’ në mbretërinë e Birit të Hyjit”.