Kardinali i ri guineas, Robert Sarah: thirrje për ta bërë Zotin gjithnjë më të pranishëm
në botë!
(20.11.2010 RV)Sipas traditës, pas krijimit të kardinajve të rinj, sot pasdite,
duke nisur nga ora 16. 30, për të përfunduar në orën 18.30, Hirësitë e tyre pritën
vizita urimi në disa nga sallat më të bukura të Vatikanit. Ndërmjet tyre, në Sallën
e Bekimeve, priti vizita edhe kardinali me origjinë nga Guinea e Re, Robert
Sarah, kryetar i Këshillit Papnor Cor Unum, dikaster që drejton veprimtarinë bamirëse
të Atit të Shenjtë në botë. E pyetëm ç’ kuptim ka për të, por edhe për Kontinentin
afrikan, emërimi i tij në Kolegjin Kardinalor:
Përgjigje: - Për
mua është mirësi e Zotit, që nuk e meritoj; është edhe thirrje për ta dashur gjithnjë
më shumë Hyjin e edhe për të vdekur për të, për Ungjillin, për shëlbimin e botës.
Është nder e thirrje, që vjen nga Zoti e më fton për një jetë më të thellë kristiane
e, sidomos, meshtarake. Mendoj se bota e sotme ka shumë nevojë për njerëz të Zotit,
njerëz që e jetojnë jetën e tyre si prani fizike e Krishtit në botë. Unë shikoj,
në nderimin që më bëhet, thirrjen e Zotit për të qenë gjithnjë gati, në shërbim të
tij. Nuk është thjesht veshja e kuqe simbol i gjakut, i cili mund të derdhet çdo
çast, është kryesisht thirrja; unë e kam kuptuar, e jam i lumtur që i përgjigjem
Zotit ‘po’, me plot gojën!