Benedikti XVI hapi Koncistorin: relativizmi, diktaturë që rrezikon ta shkatërrojë lirinë.

(19.11.2010 RV)E sotmja, në Vatikan, për Kolegjin Kardinalor, thirrur nga Ati i Shenjtë me rastin e krijimit të 24 kardinajve të rinj, ishte Ditë lutjeje e studimi.
Në fillim të takimit, mbajtur në Sallën e Re të Sinodit, kardinali Anxhelo Sodano, Dekan i Kolegjit Kardinalor, i drejtoi Papës përshëndetjen e rastit, në emër të të gjithë të pranishmëve, duke e falënderuar edhe për lumnimin, pak kohë më parë, të kardinalit Njumën, si edhe për fillimin e së njëjtës çështje, për kardinalin e ndjerë Van Thuan, lavdi e Kishës së Vietnamit.
Më pas e mori fjalën Ati i Shenjtë, i cili preku posaçërisht dy temat e propozuara për bisedimin e paradites. Së pari, kujtoi se në mandatin e Zotit për të kumtuar Ungjillin shprehet qartë kërkesa e lirisë së plotë. Por historia dëshmon se kjo kërkesë nuk realizohet lehtë. Kumtimi i Fjalës së Zotit ndesh shumë shpesh kundërshtime nga më të ndryshmet. Prej këndej, lidhja ndërmjet së vërtetës e lirisë është themelore, pa harruar se sot duhet përballuar sfida e madhe e relativizmit, i cili duket sikur e përsos konceptin e lirisë, ndërsa në të vërtetë krijon rrezikun e shkatërrimit të tij, duke marrë pamjen e një ‘diktature’ të vërtetë. Jetojmë, prandaj, në një kohë, kur nuk është aspak e lehtë të impenjohesh për afirmimin e lirisë së fesë, për kumtimin e të vërtetave të Ungjillit e të arritjeve të mëdha të kulturës së krishterë.
Përsa i përket temës së dytë, Papa vuri theksin mbi rëndësinë vendimtare të Liturgjisë në jetën e Kishës, sepse pikërisht Kisha është vendi i pranisë së Zotit me ne. Prej këndej, vendi në të cilin e vërteta jeton me ne, brenda nesh.

Gjatë paradites u shqyrtuan dy tema kryesore. Diskutimet mbi temën e lirisë së Kishës në kohën e sotme i drejtoi kardinali Tarçizio Bertone, sekretar i Shtetit të Vatikanit, ndërsa ato për temën e liturgjisë në jetën e Kishës, kardinali Kanizares, prefekt i Kongregatës për Kultin Hyjnor.
Kardinali Bertone i ftoi të pranishmit të reflektojnë për situatën e lirisë fetare në vendet perëndimore. Ndonëse bëhet fjalë për vende me identitet e kulturë të formuar nën ndikimin e fuqishëm të krishterimit, ndër to vijon të thellohet procesi i shekullarizimit, me prirje për përjashtimin e vlerave shpirtërore nga jeta shoqërore.
Së dyti, sekretari i Shtetit të Vatikanit foli për situatën e sotme të lirisë fetare në vendet islamike, duke kujtuar edhe përfundimet në të cilat arriti Asambleja e Sinodit të Ipeshkvijve për Lindjen e Mesme. Në përfundim, informoi të pranishmit për veprimtarinë e Selisë së Shenjtë dhe të Episkopateve vendase në mbrojtje të katolikëve, si në Perëndim, ashtu edhe në Lindje. Kujtoi edhe impenjimin e madh të Selisë Apostolike në fushën ndërkombëtare për të mbrojtur, në tribunat e shteteve e në atë të Kombeve të Bashkuara, lirinë fetare të besimtarëve.
Kardinali Antonio Kanizares drejtoi, më pas, diskutimet për rëndësinë e lutjes liturgjike në jetën e Kishës, duke vënë theksin mbi besnikërinë ndaj disiplinës liturgjike.
Dy ishin fjalimet kryesore të pasdites: i pari, ai i kardinalit Uiljam Levada, kushtuar “Përgjigjes së Kishës ndaj rasteve të shpërdorimeve seksuale” si dhe “Normave”, hartuar nga Selia e Shenjtë për të pranuar në Kishën katolike meshtarët dhe besimtarët anglikanë, që do të paraqesin kërkesën, në përkim me Kushtetutën “Anglicanorum coetibus”.
Më pas, fjalimi me titull: “Dhjetë vjet pas Dominus Iesus” (Deklaratë e Kongregatës për Doktrinën e Fesë), kushtuar universalitetit shëlbues të Krishtit. U mbajt nga kryeipeshkvi Anxhelo Amato, prefekt i Kongregatës për Çështjet e Shenjtorëve.
Kujtojmë se në takimin e sotëm, përveç kardinajve aktualë, ishin të pranishëm edhe 24 kardinajtë, që do të lartohen nesër në dinjitetin e kardinalatit. Mungonin vetëm ata, që i patën kërkuar leje Papës, për arsye shëndetësore ose për shkak impenjimesh urgjente baritore në dioqezat e tyre.
Prandaj të pranishëm ishin rreth 150 kardinaj.
Kujtojmë, në përfundim, se me kremtimin e 80 vjetorit të kardinalit leton Pujats Jãnis, tani Këshilli Kardinalor përbëhet nga 179 kardinaj, nga të cilët, 101 me të drejtë zgjedhore e 78 me të drejtë këshillimore.